राज्यात महाविकास आघाडीत फूट पडणार आहे. त्यांच्या वज्रमूठीला भेगा पडल्याच्या चर्चा सध्या राजकीय वर्तुळात सुरू आहेत. 2024च्या निवडणुकीत भाजप बहुमताने विजयी होईल. महाराष्ट्रात लोकसभेच्या 45 जागांवर भाजप आणि शिंदे गट विजयी होईल असा दावाही भाजपकडून सातत्याने केला जात आहे. अनेक भाजप नेत्यांचा हा दावा सुरू होता.

मात्र अशातच या दाव्याला भाजपचे नेते आणि मंत्री चंद्रकांत पाटील यांनी छेद दिला आहे. त्यांनी 2024ची लोकसभा निवडणूक ही आधीच्या दोन्ही लोकसभा निवडणुकी इतकी सोपी नसल्याचा दावा करत महाविकास आघाडीचं ऐक्य तुटणार नाही, असं भाकीतही केलं आहे. चंद्रकांत पाटील यांच्या या रोखठोक वक्तव्यामुळे भाजप नेत्यांना टेन्शन वाढणार आहे.

शिरुर तालुक्यामध्ये भाजप बुथ प्रमुखांचा मेळावा आयोजित करण्यात आला होता. या मेळाव्यामध्ये चंद्रकांत पाटील यांनी संबोधित केलं. त्यावेळी त्यांनी पुढील निवडणूक किती अवघड आहे हे स्पष्ट केलं. 2014 आणि 2019च्या निवडणुका बघता पुढील निवडणूक सोपी नाही. 2019 मध्ये आपल्यासोबत असलेले अघोषित होते. तेच आता 2024 मध्ये घोषित निवडणूक लढणार आहेत. त्यामुळे आपल्या आपल्या प्रभागातील प्रश्न सोडवावे लागणार आहेत. प्रभागात लक्ष द्यावे लागणार आहे, असं चंद्रकांत पाटील यांनी सांगितलं आहे.

तर 2024च्या निवडणुकीत भाजप बहुमताने विजयी होईल. महाराष्ट्रात लोकसभेच्या 45 जागांवर भाजप आणि शिंदे गट विजयी होईल असा दावाही भाजपकडून सातत्याने केला जात आहे. आगामी निवडणूक चुरशीची होणार असल्याचं दिसून येत आहे.