राज्यात आगामी विधानसभा निवडणुकीच्या पार्श्वभूमीवर राजकीय वातावरण तापताना दिसत आहे. यादरम्यान राष्ट्रवादी काँग्रेसच्या शरद पवार गटाचे नेते जयंत पाटील यांनी राज्याचे कृषीमंत्री धनंजय मुंडे यांच्या बद्दल मोठं विधान करत खळबळ उडवून दिली आहे. पंधरा वर्षांपूर्वी राष्ट्रवादी काँग्रेस पक्षात धनंजय मुंडे यांना घेणे, हा आमचा आत्मघातकी प्लॅन होता, असे जयंत पाटील म्हणाले आहेत.

संघाबाबत तुम्ही जानता, भाजपबाबत देखील बोललं जातं की ते प्लॅन करून ते कार्यक्रम करतात. १०-१५ वर्षांपूर्वी धनंजय मुंडे भाजपच्या संस्कृतीत वाढलेलं होते, अजित पवार हे काँग्रेस कल्चरचे आहेत. पण १०-१५ वर्षांपूर्वी धनंजय मुंडे राष्ट्रवादी पक्षात आले तो अजित पवार यांना तिकडं (भाजपमध्ये) घेऊन जाण्याचा प्लॅन होता का? त्यांना घेऊन जाण्यासाठीच ते घुसले होते का? असा प्रश्न जयंत पाटलांना विचारण्यात आला.

या प्रश्नाला उत्तर देताना जयंत पाटील म्हणाले की, गोपीनाथ मुंडे यांनी सध्या भाजप करतोय तसं काही राजकारण केलं नाही. त्यामुळे मला वाटत नाही की तसा काही प्लॅन होता. तो आमचाच आत्मघातकी प्लॅन होता, असेही जयंत पाटील म्हणाले.

जयंत पाटील हे सध्या आगामी विधानसभा निवडणुकीच्या पार्श्वभूमीवर राज्याभरात फिरत आहेत. यादरम्यान शनिवारी (27 जुलै) रोजी जयंत पाटील हे बीड जिल्ह्याच्या दौऱ्यावर होते. या दौऱ्यात जयंत पाटीलांनी विधानसभा निवडणुकीसाठी इच्छूक असणाऱ्या सदस्यांची बैठक घेतली. यानंतर माध्यमांशी बोलताना जयंत पाटील यांनी हे विधान केले आहे.