रत्नागिरीतून एक मोठी अपडेट समोर येत आहे. केरळमधील कोझिकोडमधील एलाथूरजवळ चालत्या ट्रेनमध्ये एकानं आपल्या सहप्रवाशाला पेटवून दिलं होतं. यामध्ये जळलेल्या व्यक्तीसोबतच आठ सहप्रवासी जखमी झाले होते. यातील तिघांचा मृत्यू झाला.

दरम्यान, या घटनेच्या पार्श्वभूमीवर केरळचे मुख्यमंत्री पिनराई विजयन (Kerala CM Pinarayi Vijayan) यांनी पोलिसांना एसआयटी चौकशीचे आदेश दिले होते. कोझिकोड रेल्वे आगीच्या घटनेतील एका संशयिताला पोलिसांनी महाराष्ट्रातील रत्नागिरी (Ratnagiri) येथून अटक केलीये. शाहरुख सैफी असं त्याचं नाव आहे.

केंद्रीय गुप्तचर यंत्रणा (Central Intelligence Agency) आणि महाराष्ट्र एटीएसच्या (Maharashtra ATS) संयुक्त पथकानं कोझिकोड रेल्वे आगीच्या घटनेतील फरार संशयित आरोपीला रत्नागिरी येथून जेरबंद केलंय. केरळ पोलिसांचं (Kerala Police) एक पथकही रत्नागिरीत पोहोचलं असून, आरोपीला लवकरच त्यांच्या ताब्यात दिलं जाईल, अशी माहिती महाराष्ट्र एटीएसनं दिलीये.

शाहरुख सैफीचं लोकेशन काल रत्नागिरीत ट्रेस करण्यात आलं. त्याच्या डोक्याला दुखापत झाल्यामुळं तो रत्नागिरी सिव्हिल हॉस्पिटलमध्ये उपचारासाठी आला होता. केरळमध्ये ट्रेनमधून खाली उतरताना पडल्यामुळं त्याला ही दुखापत झाली आहे. मात्र, उपचार पूर्ण न करताच त्यानं रुग्णालयातून पळ काढला होता.

यानंतर पोलिसांनी रत्नागिरी परिसरात मोठ्या प्रमाणावर शोधमोहीम राबवून शाहरुख सैफीचा शोध घेऊन त्याला ताब्यात घेतलंय. तो सध्या रत्नागिरी येथील रेल्वे संरक्षण दलाच्या (आरपीएफ) कोठडीत असून त्याची चौकशी अद्याप सुरू झालेली नाही. केरळ पोलीसही रत्नागिरीत पोहोचले आहेत.