Khadse vs Mahajan : महाराष्ट्र राज्याचे माजी मंत्री आमदार एकनाथ खडसे आणि मंत्री गिरीश महाजन यांच्यात सुरू असलेला वाकयुद्ध संपूर्ण राज्याला परिचित आहे. जिल्हास्तरावर असो की राज्यस्तरावर हे दोघेही नेते एकमेकांवर आरोप प्रत्यारोप करण्याची एकही संधी सोडत नाहीत. याचाच प्रत्यय आज विधान परिषदेमध्ये आला.

यावेळी खडसे मंत्री गिरीश महानजांना म्हणाले कि, शेतकऱ्यांचा ५० टक्के कापूस हा अजूनही घरात पडून आहे, हा प्रश्न तुम्ही सोडवा. तुम्ही मुख्यमंत्र्यांच्या जवळचे आहात, असे बोलले जाते, पण मला वाटत नाही. जर तुम्ही मुख्यमंत्र्यांच्या जवळचे असता तर तुम्ही जळगावचे पालकमंत्री झाला असतात असे खडसे म्हणाले

कापसाच्या प्रश्नावर सरकारच्या वतीने उत्तर देतांना महाजन यांनी खडसेंच्या टीकेला प्रत्युत्तर दिले. कापसाचा प्रश्न गंभीरच आहे. याविषयावर मुख्यमंत्री एकनाथ शिंदे, उपमुख्यमंत्री देवेंद्र फडणवीस हे केंद्रीय मंत्री पियूष गोयल यांच्याशी बोलले आहेत.कापूस निर्यात व भाववाढी संदर्भात ही चर्चा झाली. त्यामुळे अधिवेशन संपण्यापुर्वीच यावर सरकारच्या वतीने ठोस घोषणा केली जाईल. असे महाजन म्हणाले

मी मुख्यमंत्र्यांच्या जवळचा आहे की नाही? याची काळजी करू नये. मी मुख्यमंत्र्यांच्या जवळचाच आहे, तुमची अवस्था काय आहे? हे पहा. तुम्ही कुठे होतात आणि कुठे आलात. गावची ग्रामंपचायत देखील तुमच्या ताब्यात नाही, जिल्हा बॅंकेतून तुम्ही गेलात, नगर परिषद तुमच्याकडे नाही. असा टोला महाजन यांनी खडसेंना लगावला.

कापूस प्रश्नावर मी कडक उपोषण केले होते, पण काही जणांना माझे उपोषण सुरूच राहावे आणि मी खपलो पाहिजे असे वाटत होते, असा आरोप देखील त्यांनी केला. पण तेव्हा गोपीनाथ मुंडे व इतर नेत्यांनी मला उपोषण सोडायला लावले, असेही महाजन म्हणाले. महाजनांनी सभागृहात थेट हल्लाच चढवल्याने त्याला खडसेंकडून देखील प्रत्युत्तर दिले गेले. यामुळे दोघांमध्ये चांगलीच खडाजंगी सुरू झाली.