भाजप नेते किरीट सोमय्या यांनी ट्विट करत पुन्हा एकदा माजी परिवहन मंत्री अनिल परब यांच्यावर निशाणा साधला आहे. दापोलीतील वादग्रस्त रिसॉर्टच्या सीआरझेडमधील बांधकामप्रकरणी उद्या ( सोमवार 12 सप्टेंबर) 2 याचिकांवर सुनावण्या होणार आहेत. येत्या आठ दिवसांत वादग्रस्त साई रिसॉर्ट पाडण्याच्या संदर्भात निविदा प्रक्रिया पूर्ण होईल आणि ऑक्टोबर महिन्यात पाडले जाईल, अशी माहिती भाजपचे नेते किरीट सोमय्या यांनी दिली आहे. पुढे न्यायालयातील निकाल सकारात्मक आला तर फौजदारीची प्रक्रिया सुरू होईल असंही किरीट सोमय्या यांनी म्हटलं आहे.

यासंदर्भात सोमय्यांनी एक ट्विट करत माहिती दिली. ट्विटमध्ये ते म्हणाले की,''अनिल परब साई रिसॉर्ट घोटाळाप्रकरणी उद्या सोमवारी 12 सप्टेंबरला 2 याचिकेवर सुनावणी, दापोली न्यायालयात भारत सरकारच्या अनिल परबवर पर्यावरण कायद्या खाली फौजदारी खटला दाखल करावा आणि महाराष्ट्र सरकारच्या खेड न्यायालयात बनावटी कागदपत्र दाखवून, फसवणुकीने बिन शेती करून घेतले म्हणून कारवाई" होणार असल्याचेही त्यांनी आपल्या ट्विटमध्ये म्हटले आहे.

पत्रकार परिषदेत बोलताना सोमय्या म्हणाले होते की, 'माजी मुख्यमंत्री उद्धव ठाकरे यांच्या दबावामुळे जिल्ह्यातील अधिकाऱ्यांनी रिसॉर्टवर कारवाई केली नाही. तसेच न्यायालयातही अनिल परब यांच्यावर गुन्हा दाखल करण्यासाठी दाखल याचिकेचाही जिल्हा प्रशासनाकडून पाठपुरावा करण्यात आला नाही. पण आमच्या पाठपुराव्यानंतर रिसॉर्ट पाडण्याची जबाबदारी सार्वजनिक बांधकाम विभागाकडे देण्यात आली आहे. येत्या आठवड्याभरात निविदा प्रक्रिया केली करुन रिसॉर्ट पाडण्यात येईल, असेही सोमय्यांनी स्पष्ट केले आहे.