Shivsena-VBA Alliance :  शिवसेना (उद्धव बाळासाहेब ठाकरे) आणि वंचित बहुजन आघाडी यांच्यातील युती निश्चित झाली आहे. आज २३ जानेवारीला बाळासाहेब ठाकरे यांच्या जयंतीनिमित्त शिवसेना-वंचित बहुजन आघाडी युतीची घोषणा केली जाऊ शकते. ठाकरे गटाचे खासदार संजय राऊत यांनी देखील या चर्चेला दुजोरा दिला आहे.

महाराष्ट्रात आज क्रांतिकारी घोषणा होणार असल्याचे संजय राऊत म्हणाले. शिवसेना प्रमुख बाळासाहेब ठाकरे यांची देखील इच्छा होती की शिवशक्ती- भिमशक्ती एकत्र यावे. त्यामुळे आजची घोषणा ही ऐतिहासिक ठरणार आहे. 

शिवशक्ती- भिमशक्ती एकत्र आली तर याचे राजकीय फायदे कसे असणार हे समजून घेऊया. २०१९ च्या निवडणुकीत वंचित बहुजन आघाडी आणि एआयएमआयएमची युती झाली होती. या निवडणुकीत काँग्रेस आणि राष्ट्रवादी काँग्रेसला सर्वात मोठा फटका बसला होता.  २०१९ लोकसभा निवडणुकीत वंचित बहुजन आघाडी २४ लाखं मते मिळाली होती. तर विधानसभा निवडणुकीत वंचितला २८ लाख मते मिळाली. वंचितचे उमेदवार १० जागांवर दुसऱ्या तर २३ ठीकाणी तिसऱ्या स्थानावर होते. यामुळे मोठ्या प्रमाणात मतांचे विभाजन झाले. यामुळे २० जागांवर काँग्रेस आणि राष्ट्रवादीच्या आमदारांचा पराभव झाला. 

प्रकाश आंबेडकर महाविकास आघाडीत आले तर भाजप आणि शिंदे गटाला याचा मोठा फटका बसू शकतो. मात्र वंचितची उद्धव ठाकरे यांच्या शिवसेनेसोबत युती होणार असल्याचे स्पष्ट असले. तरी वंचितला महाविकास आघाडीत स्थान मिळेल का? यावर अजून कोणीही भूमिका स्पष्ट केली नाही. 

उद्धव ठाकरे यांचं म्हणणं आहे की आपण काँग्रेस-राष्ट्रवादीला सोबत घेतलं पाहिजे. त्यावर प्रकाश आंबेडकर यांनी सकारात्मक भूमिका घेतली आहे. मात्र याबाबत अजून अधिकृत माहिती आली नाही. प्रकाश आंबेडकरांनी महाविकास आघाडी सोबत निवडणुकाल लढवल्या तर भाजपला मत विभाजनामुळे फटका बसू शकतो, अशी चर्चा राजकीय वर्तुळात रंगली आहे. 

काँग्रेस, राष्ट्रवादीने आम्हाला नाकारले होते, पण आम्ही त्यांना नाकारले नाही. आपण केवळ दलितांपुरते मर्यादित राहावे, अशी त्यांची  इच्छा असल्याचे प्रकाश आंबेडकर यांनी स्पष्ट केले होते, मात्र काँग्रेस, राष्ट्रवादीचे ही इच्छा आम्हाला मान्य नाही, असे आंबेडकर म्हणाले होते. त्यामुळे प्रकाश आंबेडकर यांबाबत आता काँग्रेस आणि राष्ट्रवादी काय निर्णय घेणार हे पाहावे लागणार आहे.  

शिवसेना आणि वंचित आघाडीच्या युतीबाबत शरद पवार यांना विचारले असता त्यांनी, मला याबाबत माहिती नाही. मी या भानगडीत पडत नाही, असं ते म्हणाले. त्यामुळे या युतीबाबत पवारांची समहती नाही का? असा प्रश्न उपस्थित होत आहे.