मुंबई- लोकसभा निवडणुका काही महिन्यांवर येऊन ठेपल्या आहेत. त्यादृष्टीने सर्व राजकीय पक्षांकडून निवडणुकीची तयारी केली जात आहे. लोकसभेसाठी कोणाला सधी मिळणार याची इच्छूक नेत्यांमध्ये उत्सुकता आहे. त्यातच उद्धव बाळासाहेब ठाकरे यांनी दक्षिण मुंबई लोकसभा मतदारसंघासाठी उमेदवाराची घोषणा केलीये. या जागेवरुन अरविंद सावंत यांना तिकीट दिले जाणार आहे.

दक्षिण मुंबई लोकसभा मतदारसंघाची बैठक आयोजित करण्यात आली होती. यावेळी दक्षिण मुंबई लोकसभा मतदारसंघातून अरविंद सावंत निवडणूक लढवतील अशी माहिती बैठकीमध्ये देण्यात आली आहे. उद्धव ठाकरे यांनीच याची घोषणा केल्याचं सांगण्यात आलंय. तसेच येणाऱ्या निवडणुकांसाठी तयारीला लागा अशा सूचना उद्धव ठाकरे यांनी पदाधिकाऱ्यांना दिल्याचे कळते.

लोकसभा निवडणुका सात महिन्यांवर आहेत. त्यामुळे पक्षांकडून मतदारसंघातील स्थितीचा आढावा घेतला जात आहे. उद्धव ठाकरे यांनीही दक्षिण मुंबई मतदारसंघाचा आढावा घेतला. अरविंद सावंत यांनी २०१९ च्या लोकसभा निवडणुकीत ही जागा राखली होती. त्यामुळे पुन्हा एकदा त्यांना या मतदारसंघातून संधी देण्यात आली आहे.

विधानपरिषद, शिक्षक मतदारसंघाच्या निवडणुकीसाठीही तयारीला लागा, अशा सूचना उद्धव ठाकरे यांनी बैठकीत दिल्याचं कळतंय. मतदारसंघात जाऊन काम करा आणि निवडणुकीसाठी तयारी करा असं उद्धव ठाकरे पदाधिकाऱ्यांना म्हणाले आहेत. शिंदे गटाने वेगळी चूल मांडली असल्याने येत्या निवडणुकांसाठी उद्धव ठाकरेंच्या गटाला अधिक मेहनत घ्यावी लागणार आहे. (Latest Marathi News)