मुंबई : सत्ताधारी भाजपला शह देण्यासाठी विरोधक ‘एकजूट’ करीत असतानाच महाविकास आघाडीत राहण्याबाबत भूमिका मांडून शिवसेनेचे खासदार संजय राऊत यांनी खळबळ उडवून दिली.

‘जोपर्यंत आमची इच्छा आहे; तोपर्यंत महाविकास आघाडीसोबत राहू, ’ असे वक्तव्य राऊत यांनी रविवारी केले. विशेष म्हणजे, शिवसेनेचे (उद्धव बाळासाहेब ठाकरे) पक्षप्रमुख उद्धव ठाकरे हेच मुख्यमंत्री असतील, असेही राऊत यांनी सूचित केले.

शिवसेनेच्या राज्यव्यापी शिबिरात राऊत यांनी पदाधिकारी-कार्यकर्त्यांना मार्गदर्शन केले. त्यावेळी भावी मुख्यमंत्र्यांचा मुद्दा उकरून काढत, राऊत यांनी आघाडीतील घटक पक्षांतील तेही मुख्यमंत्रिपदाच्या शर्यतीतील नेत्यांना इशाराच दिल्याचे मानले जात आहे.

त्यामुळे आघाडीतील घटक पक्षांतील नव्या वादाला तोंड फुटण्याचीही शक्यता आहे. दुसरीकडे, राऊत यांच्या भूमिकेमुळे आघाडीसोबत सत्ताधारीही अवाक झाले आहेत.

उद्धव ठाकरेंचा विद्यमान मुख्यमंत्री असा उल्लेख करत राऊत म्हणाले, ‘‘सध्या महाराष्ट्रात भावी मुख्यमंत्रिपदाचे पीक जोरात आहे. पाहावे तिकडे भावी मुख्यमंत्री दिसत आहेत.

आपण महाविकास आघाडीसोबत आहोत आणि जोपर्यंत आपली इच्छा आहे, तोपर्यंत राहू. ज्यावेळी जो काही निर्णय घ्यायचा आहे, तो घेऊ. मात्र, विद्यमान मुख्यमंत्री (उद्धव ठाकरे) पुढे बसले आहेत. ते काही आमच्या इच्छांवर नाही. ते राजकारण आहे.’’

मोदी, शहाही शिवसेनेत येतील

न्यायालयाने हे सरकार घटनाबाह्य ठरवले असून, पुढील ५० दिवसांत नवे सरकार आणायचे आहे. २०२४ च्या निवडणुकीनंतर पंतप्रधान नरेंद्र मोदी आणि केंद्रीय गृहमंत्री अमित शहा हेही शिवसेनेत येतील, असा टोलाही राऊत यांनी लगावला. अहमदाबादमध्ये क्रिक्रेटचे मैदान उभारून, मुंबईतील क्रिकेटचे महत्त्व कमी करण्याचा प्रयत्न केला जात असल्याचाही आरोपही राऊत यांनी केला.

खोके दिन साजरा करा

युवासेनेचे नेते आदित्य ठाकरे यांनीही मुख्यमंत्री शिंदे यांच्यासह बंडखोर आमदार आणि शिंदे-फडणवीस सरकारवर टीका केली. ‘‘मिंधे सरकारने खोके दिन आणि जागतिक गद्दार दिन साजरा करावा,’’ असा खोचक टोला आदित्य यांनी शिंदे यांना लगावला.

शिवसेनेचा वर्धापनदिन १९ जूनला असतानाही १८ जूनला शुभेच्छा दिल्या जात असल्याचे सांगून आदित्य यांनी त्यांची खिल्लीही उडवली. महाराष्ट्राला दिल्लीपुढे झुकविण्याचा प्रयत्न होत आहे. पण कदापीही तसे घडणार नाही, असे ते म्हणाले.