पुणे - राज्याच्या आजूबाजूला सध्या कमी दाबाचा पट्टा सक्रीय झाल्यामुळे सर्वदूर पावसाने जोरदार हजेरी लावली आहे. कोकण, गोवा आणि मुंबईमध्ये मुसळधार पाऊस पडत असून, उर्वरीत राज्यातही पावसाची संततधार कायम आहे.

मॉन्सून वाऱ्यांचा आस सध्या भारताच्या दक्षिणेत आहे. तसेच, छत्तीसगडच्या दक्षिण भागासह गुजरातमध्ये कमी दाबाचा पट्टा सक्रीय झाल्यामुळे राज्यात मॉन्सूनचा जोर चांगलाच वाढला आहे. पुढील दोन दिवसांत बंगालच्या उपसागरात कमी दबाचा पट्टा तयार होण्याची शक्यता आहे.

त्यामुळे येत्या काळात कोकण-घाटमाथ्यावर जोरदार पावसाची शक्यता हवामान खात्याने वर्तवली आहे. तर मुंबईमध्ये अतिवृष्टीचा रेड अलर्ट देण्यात आला आहे. याच काळात उर्वरीत राज्यात पावसाचा जोर कायम राहील, तर तुरळक ठिकाणी मुसळधार पाऊस पडेल अशा अंदाजही वर्तविण्यात आली आहे.

गुरुवारसाठीचा अंदाज...

१) कोकण -गोवा - किनारपट्टीवर सोसाट्याचा वारा, रायगड, ठाणे, पालघर आणि मुंबईत रेड अलर्ट

२) मध्य महाराष्ट्र - बहुतांश ठिकाणी पाऊस, काही ठिकाणी जोरदार तर तुरळक ठिकाणी अतिवृष्टीचा इशारा

३) मराठवाडा - बहुतांश ठिकाणी पाऊस, तुरळक ठिकाणी मेघगर्जनेसह मुसळधार पावसाची शक्यता

४) विदर्भ - सर्वत्र पाऊस, तुरळक ठिकाणी जोरदार पाऊस

महत्त्वाची पू्र्वसूचना -

- पुढील आठवडाभर पावसाळी पर्यटन आणि घाटमाथ्यावर ट्रेकींग टाळावे

- मोठ्या पावसामुळे वाहुतक कोंडी शक्य

- सखल भागात पाणी साचण्याची शक्यता

- घाट क्षेत्रात माती आणि दरड घसरण्याची शक्यता