उपनगरी रेल्वे मार्गावरील रुळांची दुरुस्ती तसेच सिग्नल यंत्रणेतील तांत्रिक कामांसाठी रविवारी (ता. ६) मध्य रेल्वे मार्गावर मेगाब्लॉक घेण्यात येणार आहे. मध्य रेल्वेच्या ठाणे-कल्याण अप आणि डाउन जलद मार्गावर तर हार्बर मार्गावरील पनवेल ते वाशी अप आणि डाऊन मार्गावर हा मेगाब्लॉक घेण्यात येणार आहे.

पश्चिम रेल्वेच्या गोरेगाव ते कांदिवली स्थानकांदरम्यान शनिवारी (ता. ५) रात्रकालीन ब्लॉक घेण्यात येणार आहे. या दोन्ही स्थानकांदरम्यान पाचव्या रेल्वे मार्गावर रात्री 11 ते सकाळी नऊ असा 10 तासांचा तर कांदिवली ते गोरेगावदरम्यान अप जलद मार्गावर रात्री 11 ते पहाटे साडेतीन वाजेपर्यंत असा साडेचार तासांचा ब्‍लॉक घेण्यात येणार आहे.

राहुल गांधींना पुणे कोर्टाने समन्स बजावले आहेत.

महाराष्ट्राचे मुख्यमंत्री एकनाथ शिंदे म्हणतात, "एकवीरा देवी उत्सव सुरू आहे, नवरात्री जागरणही सुरू झाले आहे... दुसऱ्याच दिवशी मला येथे दर्शन घेण्याची संधी मिळाली. मी स्वत:ला भाग्यवान समजतो. याशिवाय मी सुद्धा कार्यक्रम केला. येथील मंदिराच्या विकासकामाचे भूमिपूजन ३९ कोटी रुपये खर्चून केले जाणार आहे.

कटराजवळ एका पर्यटक बसला आज आग लागली. प्रवासी सुरक्षित आहेत. पोलीस आणि एफएसएल पथक तपासासाठी घटनास्थळी पोहोचले.

कनक दुर्गा मंदिराजवळील कृष्णा नदीचा उगम महाराष्ट्रातील महाबळेश्वर येथून होतो. या नदीद्वारे महाराष्ट्र आणि आंध्र प्रदेशचा हा ‘संगम’ दोन्ही राज्यातील लोकांच्या जवळच्या नातेसंबंधाचे प्रतीक आहे,” असे शिवसेना खासदार श्रीकांत शिंदे विजयवाडा येथील कनका दुर्गा मंदिराला भेट देताना सांगितले.

नारायणपूर-दंतेवाडा सीमेवरील माड भागात पोलिसांशी झालेल्या चकमकीत आतापर्यंत 30 नक्षलवादी ठार झाले आहेत. मोठ्या प्रमाणात स्वयंचलित शस्त्रे देखील जप्त करण्यात आली असून शोधमोहीम सुरू आहे.

"सत्ताधारी पक्षाचे आमदार आणि विधानसभेचे उपाध्यक्ष श्री. नरहरी झिरवळ यांनी आणि इतर दोन आमदारांनी , आदिवासी समाजवर होणाऱ्या अन्यायाकडे लक्ष वेधून घेण्यासाठी मंत्रालयात संरक्षक जाळीवर उड्या मारून, म्हणे यांनी निषेध नोंदवला. हा कुठला निषेध ? सत्तेशिवाय राहू शकत नाही, असं म्हणणं शक्य नव्हतं, म्हणून 'जनतेच्या सेवेला सत्ता हवी', म्हणत तुम्हीच आणि तुमच्या सरदाराने सत्तेच्या जाळ्यात उड्या मारल्या होत्यात ना? सत्ता आली तरी तुम्ही स्वतःचं सोडून कोणाचंही भलं करू शकत नाही हे नक्की. बरं मुळात तुम्ही सत्ताधारी, त्यात पुन्हा संविधानिक पदावर बसलेले, तुम्ही निषेध कसले नोंदवताय?"

"आदिवासी जनतेबद्दल खरंच कळवळा असेल तर, आजपर्यंतच्या सर्व सत्ताधाऱ्यांनी, ज्यांनी आदिवासी हे मागासच राहतील हे पाहिलं त्या सगळ्यांनी संरक्षक जाळ्या नसलेल्या इमारतींवरून उड्या मारून प्रायश्चित्त घेतलं पाहिजे. महाराष्ट्राच्या राजकारणाची सर्कस करून ठेवली आहे. त्या सर्कसीत तोफेच्या आत जाऊन नंतर तिकडून बाहेर जाळ्यात फेकला जाणारा माणूस आठवतोय? तसं या सगळ्यांचं झालं आहे, आता जनतेच्या तोफेच्या तोंडी जायची वेळ आली आहे, मग आपणच स्वतः जाळ्यावर उड्या मारा. माझी महाराष्ट्राच्या जनतेला विनंती आहे की यांना तोफेच्या तोंडी जाणं म्हणजे नक्की काय असतं हे या निवडणुकीत दाखवूनच द्या. तुम्हाला गृहीत धरायचं, तुमच्या पिढ्याच्या पिढ्या बरबाद करायच्या आणि नंतर स्वतः पोरकट चाळे करायचे, या सगळ्याला झटका देण्याची, ही विकृत झालेली व्यवस्था उलथवून टाकण्याची संधी आजपासून काही आठवड्यात तुम्हाला येणार आहे. आणि या वेळेस जर तुम्ही योग्य पाऊल उचललं नाहीत तर मात्र हे लोकं परिस्थिती अधिक विदारक करतील आणि संरक्षक जाळ्या काढून तुमचाच कडेलोट करतील. तेंव्हा वेळ जायच्या आत जागे व्हा !" अशी पोस्ट मनसे अध्यक्ष राज ठाकरे यांनी सोशल मीडियावर लिहीली आहे.

छत्तीसगडच्या बस्तर भागात सुरक्षा जवानांशी झालेल्या चकमकीत १४ नक्षलवादी ठार झाले आहेत. एका वरिष्ठ पोलीस अधिकाऱ्यांने पीटीआला यासंबंधी माहिती दिली.

कोल्हापूर : लोकसभा विरोधी पक्ष नेते राहुल गांधी यांचा आजचा कोल्हापूर दौरा रद्द झाला आहे. विमानातील तांत्रिक बिघाडामुळे हा दौरा रद्द झाल्याची माहिती समोर येत आहे. कोल्हापुरातील कसबा बावडा येथील भगवा चौकातील बहुशास्त्राधारित छत्रपती शिवाजी महाराज यांच्या पुतळ्याचे गांधी यांच्या हस्ते आनावरण होणार होते. शिवाय उद्या राहुल गांधी हे सकाळी साडेआठ वाजता कोल्हापुरात येणार असल्याची माहिती आहे. दरम्यान स्वागतासाठी आलेले पदाधिकाऱ्यांनी काँग्रेस कार्यकर्ते नाराज होऊन माघारी परतले आहेत.

विविध कार्यक्रमानिमित्त काँग्रेसने राहुल गांधी आज कोल्हापूर दौऱ्यावर येणार होते. सायंकाळी साडेपाच वाजता कोल्हापूर विमानतळ येते त्यांची आगमन होणार होते. त्यासाठी काँग्रेसचे प्रदेशाध्यक्ष नाना पटोले, विजय वडेट्टीवार हे कोल्हापूर विमानतळ येथे गांधी यांच्या स्वागतासाठी झाले होते. मात्र विमानातील तांत्रिक बिघाडामुळे हा दौरा रद्द झाल्याची माहिती मिळताच पटोले आणि वडेट्टीवार हे कोल्हापूर विमानतळावरून निघून गेले.

परराष्ट्र व्यवहारमंत्री एस जयशंकर यांनी श्रीलंकेच्या पंतप्रधान डॉ. हरिणी अमरसूर्या यांची घेतली भेट. डिजिटल सार्वजनिक पायाभूत सुविधा, प्रशिक्षण आणि क्षमता निर्माण करण्यावर चर्चा झाली.

परराष्ट्र मंत्री एस जयशंकर शांघाय कोऑपरेशन ऑर्गनायझेशन (SCO) बैठकीत सहभागी होण्यासाठी पाकिस्तानला जाणार आहेत. परराष्ट्र मंत्रालयाने याला दुजोरा दिला आहे. यावेळी पाकिस्तान SCO शिखर परिषदेचे आयोजन करत आहे. ही बैठक १५ ते १६ ऑक्टोबर रोजी होणार आहे.

मराठीसह पाच भाषांना अभिजात भाषेचा दर्जा दिल्याबद्दल राज्यपाल सीपी राधाकृष्णन यांनी पंतप्रधान आणि केंद्रीय मंत्रिमंडळाचे आभार मानले आहेत. समस्त महाराष्ट्राच्या आणि मराठी भाषेच्या इतिहासात आजचा हा दिवस सुवर्ण अक्षरांनी लिहिला जाईल.- राज्यपाल

नवरात्रौत्सवात शेवटचे तीन दिवस रात्री १२ वाजेपर्यंत देवीचे जागरण, नवरात्रीचे खेळ, दांडीया, गरब्यासाठी परवानगी

हवाई दलाचे उपप्रमुख एअर मार्शल तेजिंदर सिंग यांनी वार्षिक वायुसेना दिनाच्या पत्रकार परिषदेत पुढील पाच वर्षांत भारतीय हवाई दलात समाविष्ट करण्यात येणाऱ्या स्वदेशी उपकरणांच्या मूल्याविषयी माहिती दिली आहे.

केंद्रीय मंत्री अमित शहा यांनी 140 कोटी रुपये खर्चून नव्यानं बांधलेल्या पोलीस आयुक्त कार्यालयाचं उद्घाटन केलं. या अत्याधुनिक सुविधेचा उद्देश अहमदाबाद पोलिसांसाठी नवीन कार्यप्रणाली लागू करणे, शहरातील कायद्याची अंमलबजावणी करण्याची क्षमता वाढवणे आहे.

विक्रोळीत सातवीच्या विद्यार्थीनीसोबत अश्लील कृत्य करणाऱ्या शिक्षकाविरोधात पोलीस ठाण्यात पाक्सो अंतर्गत गुन्हा दाखल करण्यात आला आहे. विक्रोळी पूर्व टागोर नगरमधील एका शाळेमध्ये शिक्षक हितेंद्र शेटे याने सातवीच्या विद्यार्थिनीसोबत अश्लील कृत्य करत तिला लगट घालण्याचा प्रयत्न केला.

आदिवासींना अनुसूचित जमातीच्या आरक्षणपासून वंचित ठेवल्यात आले आहे. मात्र काही ठराविक लोक याचा फायदा घेत आहेत. मात्र मंत्रालयात मात्र अशा पद्धतीने आदोलनं करणे चुकीचे आहे, अशी प्रतिक्रिया भाजप नेते गोपीचंद पडळकरक यांनी दिली.

श्रीलंकेचे राष्ट्रपती अनुरा कुमारा दिसानायके यांनी गेल्या आठवड्यात पदभार स्वीकारल्यानंतर परराष्ट्र मंत्री एस जयशंकर कोलंबोत दाखल झाले आहेत.

सुप्रीम कोर्टाने आंध्र प्रदेशातील तिरुमला येथील श्री व्यंकटेश्वर स्वामी मंदिरात प्रसाद बनवताना प्राण्यांच्या चरबीचा वापर केल्याच्या आरोपांची चौकशी करण्यासाठी नवीन स्वतंत्र एसआयटी स्थापन करण्याचे आदेश दिले आहेत. स

र्वोच्च न्यायालयाच्या आदेशानुसार, एसआयटीमध्ये दोन सीबीआय अधिकारी, दोन आंध्र प्रदेश पोलिस अधिकारी आणि एफएसएसएआयच्या एका वरिष्ठ अधिकाऱ्याचा समावेश असेल. सीबीआयचे संचालक एसआयटीच्या तपासावर लक्ष ठेवतील.

आदिवासी आमदार आज मंत्रालयात दाखल झाले असून, उपमुख्यमंत्री अजित पवार यांच्याशी ते महत्वपूर्ण चर्चा करण्यासाठी भेटणार आहेत. या भेटीत आदिवासी समाजाच्या विविध मुद्द्यांवर चर्चा होण्याची शक्यता आहे, ज्यात त्यांचे हक्क, विकास योजना, तसेच शासकीय धोरणे यांचा समावेश असेल.

आजच्या कॅबिनेटच्या अजेंड्यात विविध महत्त्वाचे मुद्दे समोर आले आहेत. मागील बैठकीच्या इतीवृत्तांताला मान्यता देणे हा पहिला विषय होता. राज्यातील पाऊस आणि पीक पाण्याच्या स्थितीवर चर्चा झाली. 'लाडकी बहीण' योजनेचा विभागवार आढावा घेण्यात आला. ॉ

पुणे आणि कोकणात कायमस्वरूपी नवी SDRF टीम तैनात करण्याचा प्रस्ताव देखील चर्चेत आला. धरणांवरील जलविद्युत प्रकल्प BOT तत्त्वावर देण्याबाबतही निर्णय घेण्यात आला. याशिवाय आयत्यावेळी येणाऱ्या विषयांवर चर्चा होण्याची शक्यता आहे.

कोल्डप्ले कॉन्सर्टच्या तिकिटांच्या काळाबाजार प्रकरणी विलेपार्ले पोलीस ठाण्यात ३० जणांविरोधात गुन्हा दाखल करण्यात आला आहे. बुक माय शो या तिकिट बुकिंग संकेतस्थळाच्या तक्रारीवरून हा गुन्हा दाखल करण्यात आला. बुक माय शो ने संशयितांची नाव, मोबाईल क्रमांक, संकेतस्थळे आणि समाज माध्यमांवरील खात्यांची माहिती पोलिसांना दिली आहे. आर्थिक गुन्हे शाखेने याप्रकरणी चौकशी सुरू केली असून, अज्ञात व्यक्तींविरुद्ध भारतीय न्यायसंहिता कलम ३१८(४), ३१९(२) आणि माहिती तंत्रज्ञान कायद्याच्या ६६(क) अंतर्गत गुन्हा नोंदवला आहे.

Tirupati Laddu Prasad : मद्रास उच्च न्यायालयाच्या मदुराई खंडपीठाने FSSAI ला पुरवणी नोटीस जारी करण्याचे निर्देश दिले आहेत आणि तिरुपती लाडू बनवण्यासाठी वापरल्या जाणाऱ्या तुपाच्या पुरवठ्याशी संबंधित प्रकरणात एआर डेअरी फूडला उत्तर देण्यासाठी वेळ द्यावा.

निपाणी : केंद्रीय रस्ते वाहतूकमंत्री नितीन गडकरी आज (ता. ४) निपाणी दौऱ्यावर येत आहेत. केएलईचे कार्याध्यक्ष डॉ. प्रभाकर कोरे यांचा नागरी सत्कार व व्हीएसएम सोमशेखर कोठीवाले एमबीए, एमसीए इमारत उद्‌घाटन या कार्यक्रमांना ते उपस्थित राहणार आहेत. गडकरी सकाळी ८.३० वाजता नवी दिल्ली येथून विमानाने कोल्हापूरच्या दिशेने प्रयाण करतील. सकाळी १०.३० वाजता उजळाईवाडी विमानतळावर आगमन होईल.

मिर्झापूर : उत्तर प्रदेशातील मिर्झापूर येथे गुरुवारी रात्री उशिरा एक मोठी दुर्घटना घडली. भदोही जिल्ह्यातून 13 जणांना घेऊन बनारसला जात असलेल्या ट्रॅक्टरला एका अनियंत्रित ट्रकने मागून जोराची धडक दिली. या अपघातात 10 जणांचा मृत्यू झाला, तर तीन जण जखमी झाले आहेत. पोलिसांनी घटनास्थळी पोहोचून बचावकार्य सुरु केले आहे. जखमींना रुग्णालयात दाखल करण्यात आले आहे. पोलिसांनी या प्रकरणी एफआयआर नोंदवला आहे.

सर्वपक्षीय आदिवासी आमदार मुख्यमंत्र्यांना आज पुन्हा भेटणार असल्याची माहिती मिळत आहे. बुधवारी आमदारांनी मुख्यमंत्री एकनाथ शिंदेंना भेटण्यासाठी वेळ मागितली होती. पेसा भरती आणि धनगरांना आदिवासीतून आरक्षण नको, ही प्रामुख्याने त्यांची मागणी आहे.

नवी दिल्ली : सर्वोच्च न्यायालय आज तिरुपती लाडूमधील प्राण्यांच्या चरबीच्या कथित भेसळीच्या प्रकरणासह न्यायालयाच्या देखरेखीखाली चौकशीची मागणी करणाऱ्या अनेक याचिकांवर सुनावणी करणार आहे. तुषार मेहता यांनी या प्रकरणी सुनावणीची विनंती न्यायालयाला केली होती. न्यायमूर्ती बीआर गवई यांच्या नेतृत्वाखालील खंडपीठाने ही विनंती मान्य केली आणि आज सकाळी प्रथम सुनावणी घेण्यास सांगितले.

हुपरी : खुन्नस देत असल्याच्या कारणातून नवनाथ बाळासाहेब चोरमुले (वय २४ रा. तळंदगे) या तरुणावर तलवारीने हल्ला केल्याच्या घटनेचा छडा स्थानिक गुन्हे अन्वेषण शाखेच्या पथकाने लावला. याप्रकरणी चौघांना अटक केली. पप्पू ऊर्फ आशितोष आप्पासो जाधव (वय २३, रा. पट्टणकोडोली) या मुख्य संशयित आरोपीसह प्रथमेश उर्फ चिक्या बाजीराव दाईंगडे (वय २२, रा. तळंदगे), समर्थ विजय पाटील (वय १९, रा. नवीन घरकुल वसाहत, कागल) व अभिषेक ऊर्फ नमक संजय मलके (वय १९, रा. कोरवी गल्ली, कागल) अशी संशयितांची नावे आहेत.

इचलकरंजी : भाजपचे माजी जिल्हाध्यक्ष हिंदूराव शेळके यांनी सांगलीत ज्येष्‍ठ नेते शरद पवार यांची भेट घेतली. भाजपचे प्रदेश उपाध्यक्ष सुरेश हाळवणकर यांचे ते निकटचे सहकारी म्हणून कोल्हापूर जिल्ह्यात परिचित आहेत. आमदार प्रकाश आवाडे यांच्या विरोधातही त्यांनी प्रदीर्घ काळ इचलकरंजीत राजकारण केले आहे.

Latest Marathi Live Updates 4 October 2024 : महाराष्ट्रात विधानसभा निवडणुकीच्या घोषणेला अवघे काही दिवस उरले असताना केंद्र सरकारने मराठीला अभिजात भाषेचा दर्जा देण्याचा निर्णय घेतला आहे. तसेच लोकसभेचे विरोधी पक्षनेते आणि काँग्रेसचे नेते राहुल गांधी आजपासून दोन दिवस कोल्हापूर दौऱ्यावर येत आहेत. सायंकाळी ५ वाजून ४० मिनिटांनी कोल्हापूर विमानतळावर त्यांचं आगमन होईल. तर, केंद्रीय रस्ते वाहतूकमंत्री नितीन गडकरी आज निपाणी दौऱ्यावर येत आहेत. सांगली जिल्ह्यात काँग्रेसकडून इच्छुक विधानसभेच्या उमेदवारांच्या मुलाखती घेण्यासाठी जिल्ह्याच्या निरीक्षक, सोलापूरच्या खासदार प्रणिती शिंदे शनिवारी (दि.५) सांगलीत येणार आहेत. साडेतीन शक्तिपीठांपैकी प्रमुख पीठ असलेल्या कोल्हापुरातील करवीर निवासिनी श्री अंबाबाई मंदिरात शारदीय नवरात्रोत्सवाला प्रारंभ झाला आहे. यासह देश आणि राज्यातील महत्त्वाच्या घडामोडी तसेच वाहतूक कोंडी, राजकीय घडामोडी, क्रीडा, मनोरंजन, मान्सून या सर्व घडामोडींचे अपडेट जाणून घ्या एका क्लिकवर..