Maharashtra, Pune And Mumbai Rain Updates:

अनेक दिवसांच्या विश्रांतीनंतर महाराष्ट्रात मान्सूनचे पुनरागमन होणार आहे. हवामान खात्याने (IMD) दिलेल्या माहितीनुसार सोमवारपासून पुढील तीन दिवस राज्याच्या अनेक भागात मुसळधार पावसाची शक्यता आहे.

अंदमानवरील कमी दाबाच्या पट्ट्यामुळे राज्यात पावसाचा जोर वाढणार आहे. त्यामुळे पुढील चार ते पाच दिवस राज्यातील बहुतांश भागात पाऊसाचा धुमाकूळ असणार आहे.

दरम्यान हवामान विभागाच्या पुणे खात्याने दिलेल्या माहितीनुसार, 23 सप्टेंबरपासून पश्चिम राजस्तानातून परतीच्या पावसासाठी अनुकूल वातावरण निर्माण झाले आहे. त्यामुळे आज गोवा आणि कोकण परिसरात तुरळक पावसाची शक्यता आहे.

दुसरीकडे मध्य महाराष्ट्र, मराठवाडा आणि विदर्भातील बऱ्याच ठिकाणी पाऊस पडण्याची शक्यता आहे. तर आजपासून पुढील तीन दिवस राज्यांतील अनेक भागांत मोठा पाऊस होण्याची शक्यता आहे.

कोणत्या जिल्ह्याला कोणता अलर्ट?

24 सप्टेंबर रोजी रायगड, परभणी, हिंगोली आणि नांदेड; 25 सप्टेंबर रोजी पालघर, ठाणे, पुणे व 26 सप्टेंबर रोजी नाशिक जिल्ह्यातील काही ठिकाणी मेघ गर्जना आणि विजांच्या कडकडासह मुसळधार पाऊस होण्याची शक्यता आहे. त्यामुळे सर्व जिल्ह्यांना ऑरेंज अलर्ट देण्यात आला आहे.

सध्याच्या हवामान परिस्थितीनुसार प्रदीर्घ विश्रांतीनंतर सोमवारपासून मुंबईत पावसाला सुरुवात होण्याची शक्यता आहे.

या आठवडाभर मुंबई, ठाणे, पालघर, रायगडमध्ये चांगला पाऊस पडण्याची शक्यता आहे. तर ऑक्टोबरमध्ये रिमझिम आणि मेघगर्जनेसह पाऊस पडण्याची शक्यता आहे.