मुंबई - कर्नाटक विजयापासून काँग्रेस पक्ष अलर्ट मोडवर आला आहे. राज्यभरात काँग्रेसकडून संघटन मजबूत करण्यावर भर देण्यात येत आहे. त्यातून अनेक नेत्यांचे दौऱे सुरू आहे. त्यातच आमदार प्रणिती शिंदे यांच्या उपस्थित आज मावळ लोकसभा मतदार संघात मोर्चे बांधणीसाठी बैठक पार पडली. यावेळी प्रणिती शिंदे यांनी सरकारवर जोरदार टीका केली.

प्रणिती शिंदे म्हणाल्या की, राज्यामध्ये लोकशाहीच्या माध्यमातून निवडून आलेलं सरकार दिसत नाही. केवळ षडयंत्र रचून सगळ्यांना इकडून तिकडे नेण्याचं काम भाजप करत आहे. महाराष्ट्रामध्ये स्थिर सरकार फक्त काँग्रेस पक्ष देऊ शकतो, दुसरा कोणताही पक्ष देऊ शकत नाही.

ठाण्यातील रुग्णालयातील घटनेवर प्रणिती शिंदे म्हणाल्या की, ही घटना अत्यंत वाईट आहे. ठाणे मुख्यमंत्र्यांचा मतदार संघ असूनही अशा गोष्टीकडे सरकारच लक्ष नाही. दगावलेल्या रुग्णांना सरकार काही मदत द्यायला पण तयार नाही. सरकारला या बाबतीत काहीच गांभीर्य नाही. याचा आम्ही निषेध करतो. त्यामुळेच महाराष्ट्राला स्थिर आणि सहानुभूतीशील सरकारची गरज असल्याचं प्रणिती शिंदे यांनी नमूद केलं.