महाराष्ट्रात सत्तापरिवर्तन झाल्यानंतर, आज (रविवार) विधानसभा अध्यक्षपदाची निवडणूक होणार आहे. अध्यक्षपदासाठी शिवसेना (Shiv Sena) आमदार राजन साळवी (Rajan Salvi) आणि भाजप (BJP) आमदार राहुल नार्वेकर (Rahul Narvekar) यांच्यात लढत होत आहे. एनडीएकडून भाजपचे आमदार राहुल नार्वेकर आणि एमव्हीएकडून शिवसेनेचे आमदार राजन साळवी मैदानात आहेत. खरं तर 4 जुलै रोजी होणाऱ्या फ्लोअर टेस्टपूर्वी एकनाथ शिंदे सरकारसाठी आजची ही अग्निपरीक्षाच असणार आहे.

राज्यपाल भगतसिंह कोश्यारी यांच्या निर्देशानुसार, विधानसभेचे दोन दिवसांचं विशेष अधिवेशन 3 आणि 4 जुलै रोजी मुंबईत होत आहे. नव्या सरकारच्या स्थापनेनंतर तातडीनं बोलावलेल्या या अधिवेशनात आज 3 जुलै रोजी अध्यक्षपदाची निवडणूक होणार आहे. या निवडणुकीत महाविकास आघाडी संपूर्ण ताकदीनिशी उतरली आहे. अध्यक्षपदाचे शिवसेनेचे उमेदवार राजन साळवी यांना निवडून देण्यासाठी शिवसेना, काँग्रेस, राष्ट्रवादी या महाविकास आघाडीतील तिन्ही घटक पक्षांकडून व्हीप जारी करण्यात आलाय.

एकनाथ शिंदे यांच्या नेतृत्वात शिवसेनेच्या काही आमदारांनी बंड पुकारत भाजपच्या मदतीनं सरकार स्थापन केलं असलं तरी शिवसेनेनं बजावलेल्या व्हीपचं पालन त्यांना करावं लागणार आहे, अन्यथा शिंदे गटातील बंडखोर आमदारांवर शिवसेनेकडून अपात्रतेच्या कारवाईचा बडगा उगारला जाणार आहे. शिवसेनेचे उद्धव ठाकरे गटाचे सुनील प्रभू यांनी निवडणुकीबाबत आमदारांना व्हीप जारी केलाय. दरम्यान, राष्ट्रवादी काँग्रेसचे अध्यक्ष शरद पवार (Sharad Pawar) म्हणाले, उपसभापती नरहरी झिरवळ हे त्यांच्याविरुद्ध अविश्वास प्रस्ताव असूनही काळजीवाहू अध्यक्ष म्हणून त्यांची जबाबदारी पार पाडू शकतात, असं त्यांनी स्पष्ट केलंय.