काॅंग्रसचे आमदार चंद्रकांत जाधव (Chandrakant Jadhav) यांच्या निधनानंतर कोल्हापूर उत्तर विधानसभेची पोटनिवडणूक (Kolhapur North Assembly By-election) जाहीर करण्यात आली. या पोटनिवडणुकीचा आज निकाल लागणार आहे. या निवडणुकीत भाजपकडून सत्यजित कदम (Satyajit Kadam), तर महाविकास आघाडीकडून चंद्रकांत जाधव यांच्या पत्नी जयश्री जाधव (Jayashree Jadhav) यांना उमेदवारी देण्यात आलीय. सध्या काही फेऱ्यांचे कल हाती आले असून यात महाविकास आघाडीच्या उमेदवार जयश्री जाधव यांनी आघाडी घेतल्याचं कळतंय, तर भाजपचे उमेदवार पिछाडीवर आहेत.

या निकालाच्या पार्श्वभूमीवर जयश्री जाधव यांनी माध्यमांशी संवाद साधताना भाजपवर निशाणा साधलाय. जयश्री जाधव म्हणाल्या, 'कोल्हापूरची जनता स्वाभिमानी आहे. आण्णांच्या माघारी त्यांनी आपलं कर्तव्य पार पाडलंय. त्यामुळं आमचा विजय निश्चित होणार आहे. भाजपला (BJP) कोल्हापूरच्या मतदारांनी नाकारलं असून त्यांचा पराभव होणार आहे. आण्णांच्या माघारी, आपली जबाबदारी कोल्हापूरकरांनी चोख पार पाडली आहे. त्यामुळं आण्णांनी जे पेरलं, ते खरंच चांगलं उगवलंय.'

जाधव पुढं म्हणाल्या, गट-तट बाजूला ठेवून महाविकास आघाडी (Mahavikas Aghadi) एकत्र आली, याचा मला जास्त आनंद आहे. माझ्या या विजयाचं संपूर्ण श्रेय मी महाविकास आघाडीसोबतच मंत्री सतेज पाटील, हसन मुश्रीफ, राजेश क्षीरसागर आणि कोल्हापूरच्या जनतेला देणार आहे, असा ठाम विश्वास त्यांनी निकालाआधीच व्यक्त केला. जाधव यांनी भाजप प्रदेशाध्यक्ष चंद्रकांत पाटील यांच्यावरही टीका केलीय. निवडणुकीत चंद्रकांतदादांनी मन मोठं दाखवायला हवं होतं, पण त्यांनी दाखवलं नाही, अशी खंत त्यांनी व्यक्त केली.