मराठा आरक्षणाचा मुद्दा राज्यात पुन्हा एकदा पेटताना दिसत आहे. आरक्षणाच्या मागणीसाठी मनोज जरांगे पाटील हे २० जुलैपासून पुन्हा उपोषणाला बसणार आहेत. तर मराठा शांतता रॅलीचा पश्चिम महाराष्ट्रातील दुसरा टप्पा ७ ऑगस्टपासून सुरू होणार आहे, अशी माहिती जरांगे पाटील यांनी आज माध्यमांशी बोलताना दिली. मराठा शांतता रॅलीचा दुसरा टप्पा हा सोलापूर येथून सुरू होणार आहे तर त्याचा समारोप हा नाशिकमध्ये होईल असेही मनोज जरांगे पाटील यावेळी म्हणाले.

विधानसभा निवडणुकीत २८८ जागा लढवण्याबद्दल विचारले असता जरांगे पाटील म्हणाले की, मी २० तारखेला उपोषणाला बसतोय, त्या दिवशी मराठा समाजाची किती तारखेला बैठक घ्यायची ते ठरवले जाईल. महाराष्ट्रातील सर्व मराठा समाज त्या दिवशी बैठकीला एकत्र येईल आणि त्याच दिवशी मराठा समाजाला विचारून मी ठरवणार आहे की, २८८ निवडून आणायचे की पाडायचे, असे जरांगे पाटील यांनी स्पष्ट केले.

मनोज जरांगे यांना देवेंद्र द्वेष हा रोग झालाय असं म्हणणारे भाजप आमदार प्रसाद लाड यांच्यावर यावेळी मनोज जरांगेंनी शेलक्या भाषेत टीका केली. ज्या मुलांना कुणबी प्रमाणपत्र मिळालं आहे अशा ४०० ते ५०० पोरांना ठाण्याच्या एसपींनी कुणबी प्रमाणपत्र असताना बाहेर काढून ओपन कॅटगरीमध्ये टाकलं. तुम्हाला मराठ्यांची आस्था असेल तर हे देवेंद्र फडणवीसांनी असं का केलं ते विचारा असेही मनोज जरांगे यावेळी प्रसाद लाड यांना उद्देशून म्हणाले. यावेळी मनोज जरांगे यांनी पोलिस भरतीची तयारी करणाऱ्या एका मुलाचे कुणबी प्रमाणपत्र देखील माध्यमांसमोर दाखवले.

तसेच मनोज जरांगे यांनी यावेळी देवेंद्र फडणवीस यांना देखील इशारा दिला. ते म्हणाले की, तुम्ही मराठ्यांचे आमदार, मंत्री अंगावर घालू नका. तुम्ही मराठ्या-मराठ्यांमध्ये मारामारी लावू नका. देवेंद्र फडणवीस साहेब मी गोडीत सांगतोय. मराठे आता मारामाऱ्या करणार नाहीत, ते तुमच्याकडे निघतील. तुम्ही भांडण लावून आमची मजा बघू नका, मराठे खवळले तर गय करणार नाहीत, असेही मनोज जरांगे यावेळी म्हणाले.