छत्रपती संभाजीनगर : ‘‘मराठा आरक्षणासाठी (Maratha Reservation) पाच महिन्यांपासून आंदोलन सुरू आहे. आम्हाला मुंबईला जाण्याची हौस नाही; परंतु, सरकार २० जानेवारीपर्यंत आरक्षण देईल याबाबत साशंकता आहे,’’ असे आंदोलनकर्ते मनोज जरांगे (Manoj Jarange) यांनी बुधवारी माध्यमांना सांगितले. गोळ्या घातल्या तरी आरक्षण घेतल्याशिवाय मागे हटणार नसल्याचाही इशारा त्यांनी दिला.

शहरातील खासगी रुग्णालयात उपचार घेणाऱ्या जरांगे यांनी आरक्षणासंदर्भात पुन्हा भूमिका मांडली. ‘‘लढा सुरू आहे. हे आंदोलन आता जनआंदोलन बनले आहे. त्यामुळेच ५४ लाख मराठ्यांना कुणबी प्रमाणपत्र मिळून आरक्षणाचा लाभ मिळणार आहे. मात्र, सरसकट मराठा समाजाच्या आरक्षणासाठी ठाम असून, त्यासाठीच आता मुंबईत आंदोलन करण्याचा निर्णय घेतला आहे,’’ असेही ते म्हणाले.

आंदोलनाचे आमचे टप्पे आधीच पडलेले आहेत. त्यामुळे २० जानेवारीला आम्ही निघणार म्हणजे निघणारच. एकदा अंतरवाली सराटी गाव सोडले, की आरक्षण आणल्याशिवाय मागे येणार नाही. भविष्यात मुलांचे हाल होऊ नयेत यासाठी सर्वांनी घराबाहेर पडावे, असे आवाहनही जरांगे यांनी केले.

पालकमंत्री भुमरे यांनी घेतली भेट

पालकमंत्री संदीपान भुमरे यांनी दुपारी रुग्णालयात येऊन मनोज जरांगे यांनी भेट घेतली. या वेळी त्यांनी जरांगे यांच्या तब्येतीची विचारपूस केली. मराठवाड्यामध्ये पुन्हा शिंदे समिती आली पाहिजे, २०१७ मध्ये आयटीची परीक्षा देणाऱ्यांना नियुक्तिपत्रे दिली पाहिजेत आदी मागण्या जरांगे-पाटील यांनी भुमरे यांच्याकडे केल्या.

मार्गाविषयी आज माहिती देणार

अंतरवाली सराटी येथून मुंबईच्या दिशेने पायी जाण्याचा मार्ग कसा असावा, यासाठी काही टीम नेमण्यात आल्या आहेत. त्या पाहणी करत आहेत. आम्ही मुंबईकडे पायी, ट्रॅक्टर, ट्रक तसेच जी काही वाहने मिळतील ती घेऊन निघणार आहोत. हा मार्ग कसा असेल, याविषयी गुरुवारी सांगणार असल्याचेही जरांगे यांनी नमूद केले.