Maratha Reservation: मराठा समाजाच्या सुनील कावळे या तरुणाने केलेली आत्महत्या हे सरकारचे पाप असून मराठा समाजाच्या आरक्षणाच्या लढ्यातील एकाचेही बलिदान आम्ही वाया जाऊ देणार नाही, असा इशारा मनोज जरांगे-पाटील यांनी आज दिला. सरकारने आरक्षणाविषयी येत्या २२ तारखेपर्यंत निर्णय न घेतल्यास पुढील आंदोलन सरकारला पेलवणार नाही, असेही ते म्हणाले.

मराठा समाजाच्या आरक्षणासाठी लढा देणारे मनोज जरांगे-पाटील आज (ता. १९) नवी मुंबईत आले होते. या वेळी मराठा समाज बांधवांनी त्यांचे स्वागत केले. त्यांनी वाशी येथील छत्रपती शिवाजी महाराज चौकातील महाराजांच्या आश्वारूढ पुतळ्याला पुष्पहार अर्पण करून अभिवादन केले.

आपल्या आंदोलनाविषयी माहिती देताना त्यांनी मुंबईत घडलेल्या प्रकाराबाबत सरकारवर ताशेरे ओढले. लोकशाहीच्या मार्गाने आंदोलन होत असताना सरकार मात्र आरक्षणाविषयी गंभीर नसल्याचे ते म्हणाले. सरकारने आमच्याकडून वेळ घेतलेली आहे. त्याबद्दल सरकारकडून अजून अधिकृत माहिती आलेली नाही. मराठा समाजाला आरक्षण मिळावे यासाठी अनेक तरुण शहीद झाले आहेत. याला सरकारच जबाबदार आहे, असेही ते म्हणाले.

शरद पवार यांच्या बारामती या बालेकिल्ल्यात होणाऱ्‍या जाहीर सभेविषयी बोलताना ते म्हणाले, आपण कुणाच्याही बालेकिल्ल्यात नाही. बालेकिल्ला म्हणून कोणताही परिसर मानत नाही. संपूर्ण महाराष्ट्र हा मराठा समाजाचा बालेकिल्ला आहे. त्या ठिकाणी जाऊन मी मराठा आरक्षणाविषयी सरकारला जागे करण्यासाठी जाहीर सभा घेणार असल्याचेही जरांगे-पाटील यांनी स्पष्ट केले.