मुंबईः मराठा आरक्षणाच्या मागणीसाठी मनोज जरांगे पाटील महाराष्ट्र पिंजून काढत आहेत. त्यांनी सरकारला दिलेला वेळ २४ ऑक्टोबर रोजी संपत असल्याने सरकार याबाबत काय निर्णय घेणार? हे बघावं लागणार आहे. त्यातच नारायण राणे यांनी कुणबी प्रमाणपत्र घेणार नसल्याचं म्हटलं होतं. त्यांच्यानंतर आणखी एका नेत्याने भूमिका मांडली आहे.

शिवसेना नेते रामदास कदम यांनीदेखील मनोज जरांगे यांच्या मागणीला विरोध केला आहे. कोकणातला मराठा कुणबी प्रमाणपत्र घेणार नाही. कारण कुणबी आणि मराठ्यांमध्ये रोटी-बेटी व्यवहार होत नाही, असं थेट भाष्य रामदास कदम यांनी केलं आहे. शिवाय मनोज जरांगेंचा अभ्यास नाही, असंही ते म्हणालेत.

काय म्हणाले रामदास कदम?

कोकणातला एकही मराठा कुणबी प्रमाणपत्र घेणार नाही. मनोज जरांगेंच्या मागणीला माझा विरोध असून सरसकट आरक्षण देण्याची मागणी मला मान्य नाही. कोकणामध्ये कुणबी आणि मराठा समाजामध्ये रोटीबेटी व्यवहार चालत नाही, हे जरांगेंना माहिती नसून त्यांच्या अभ्यास नाही. मी दाव्याने सांगतो कोकणातला एकही मराठा कुणबी प्रमाणपत्र घेणार नाही.

नारायण राणे काय म्हणाले होते?

कुठलाच मराठा कुणबी प्रमाणपत्र घेणार नाही. ९६ कुळी मराठा आणि कुणबी मराठा वेगळे आहेत. त्यामुळे मीसुद्धा आयुष्यभर कुणबी प्रमाणपत्र घेणार नाही. मराठा आणि कुणबी एकच असल्याचं मनोज जरांगे पाटील म्हणत आहेत. परंतु ते तसं नाही. मराठा आणि कुणबी वेगळे आहेत. मी मराठा आरक्षणाचा अभ्यास केला आहे, तसा तो जरांगे पाटलांनीही करावा.