राज्यात मराठा आरक्षणावरून आंदोलक आक्रमक झाले आहेत, यामुळे राज्यातील राजकारण देखील तापलं आहे. मराठा आंदोलनाच्या मागणीसाठी आंदोलकांनी आमदारांची घरे, गाड्या जाळल्या, रास्तारोको केले, राजकीय पक्षांची कार्यालय फोडली. रस्ते वाहतूक, महामार्ग रोखून धरले जात आहेत. काही भागात मराठा आंदोलक आक्रमक झाले आहेत. त्यामुळे एसटी सेवा देखील बंद ठेवण्यात आली आहे.

मराठा आरक्षणाच्या प्रकरणावर मुंबईत सह्याद्री अतिथीगृहावर सर्वपक्षीय बैठकीच आयोजन करण्यात आले होते. या बैठकीत कोणताही ठोस निर्णय झाला नाही. मराठा समाजाला आरक्षण देण्यावर सर्वपक्षीय नेत्यांचे एकमत झाले. शांतता राखा आणि मनोज जरांगे पाटील यांनी उपोषण मागे घ्यावं, असं नेत्यांनी म्हटलं आहे. आता महाराष्ट्रात घडामोंडीची दिल्लीत दखल घेतल्याच्या चर्चा आहेत. राजधानी दिल्लीत देखील घडामोडींना वेग आला आहे.

आज भाजपा नेते आणि राज्याचे उपमुख्यमंत्री देवेंद्र फडणवीस आणि भाजप प्रदेशाध्यक्ष चंद्रशेखर बावनकुळे हे केंद्रीय गृहमंत्री अमित शाह यांची भेट घेणार आहे. या भेटीवेळी मराठा आरक्षणाबाबतही या भेटीत चर्चा होणार असल्याची माहिती आहे.

आज दुपारी 3.30 वाजता ही महत्त्वाची बैठक पार पडणार आहे. मराठा आरक्षणाबाबत सरकारच्या हालचाली वाढल्या आहे. दिल्लीत होणाऱ्या बैठकीकडे याकडे सर्वांचं लक्ष लागलं आहे.