latest Rain news: नाशिक व अहमदनगर जिल्ह्यातील विविध धरणांतून विसर्ग करण्यात येत असलेल्या जुने कायगाव (ता.गंगापूर) येथील गोदावरी नदीच्या पाणीपातळीत वाढ होऊन नदीला पूर आला आहे. त्यामुळे नदीकाठावरील गावांच्या नागरिकांनी पूरस्थितीदरम्यान सुरक्षित स्थळी सतर्क राहावे, असा इशारा गंगापूर तालुका प्रशासनाने दिला आहे. जुने कायगाव येथील प्राचीन शिवालय मंदिरांना पुराच्या पाण्याने वेढलेले आहे.

नाशिक व नगर विभागातून जायकवाडी धरणाकडे गोदावरी व प्रवरा नदीच्या मार्गाने पाणी दाखल होत आहे. गंगापूर तालुक्यातील

गोदावरी नदीच्या पूर काळात नदीकाठावरील मासेमारी करणारे, शेतकरी, नागरिक यांनी आपल्या मौल्यवान वस्तू, पशुधन, महत्त्वाची कागदपत्रे, अन्नधान्य संसारभांडे पूरस्थितीपासून उंच ठिकाणच्या सुरक्षित स्थळी राहावे. पुराच्या पाण्यात कोणीही उतरू नये, जुने कायगाव येथील गोदावरी नदीपुलावर वाहने उभी करून पूर पाणी पाहण्यासाठी, मोबाइलमध्ये सेल्फी काढण्यासाठी वाहने उभे करू नयेत, असे आवाहन तहसीलदार नवनाथ वगवाड यांनी केले. तहसीलदार वगवाड यांनी आपती व्यवस्थापन विभाग आणि गोदावरी नदीकाठच्या लोकांना सुरक्षित स्थळी राहण्यासंबंधी पत्र काढलेले आहे. त्या-त्या गावांतील सरपंच, पोलिस पाटील, तलाठी, मंडळ अधिकारी, कृषी सहायक, ग्रामसेवक, रेशन दुकानदार यांनी आपल्या गाव हद्दीतील लोकांना सावध राहण्याच्या सूचना आपल्या स्तरावरून देण्याचे निर्देशत केलेले आहे.

या गावांना पुराचा संभाव्य धोका

जायकवाडी प्रकल्पामुळे पुनर्वसन झालेल्या गंगापूर तालुक्यातील नेवरगाव, हैबतपूर, अगरकानडगाव, ममदापूर, जामगाव, कायगाव, अमळनेर, लखमापूर, गळनिंब, भिवधानोरा, अगरवाडगाव, धनगरपट्टी, शंकरपूर, लक्ष्मीखेडा आदी गावांना नदी पुराचा संभाव्य धोका असतो. तर जायकवाडी धरण भरत आल्यावर शिवना नदीला उलटा पाण्याचा प्रवाह वाहतो. त्यामुळे पखोरा, सोलगाव, पुरी, ढोरेगाव, सय्यदपूर, पिंपळवाडी, पेंडापूर या शिवारातील नदीकाठच्या गावांना संभाव्य धोका असतो.