मुंबईतील मुलुंडमध्ये एका मराठी स्त्रीला, ती मराठी आहे म्हणून व्यवसायासाठी जागा नाकारल्याची घटना समोर आली होती. यानंतर राज्यभरात संताप व्यक्त केला जात आहे. दम्यान या प्रकरण महाराष्ट्र नवनिर्माण सेनेकडून पुढाकार घेत जागा नाकारणाऱ्यांना जाब विचारण्यात आला होता.

या घटनेनंतर मनसे अध्यक्ष राज ठाकरे यांनी देखील सोशल मीडियावर पोस्ट करत हे असले प्रकार खपवून घेतले जाणार नाहीत. मुंबईत, महाराष्ट्रात जर पुन्हा हे असं काही घडलं तर गालावर वळ उठतील हे निश्चित असा इशारा देखील दिला होता. दरम्यान मनसेने या प्रकरणावर राज ठाकरे यांचं जुनं व्यंगचित्र सोशल मीडियावर पोस्ट केलं आहे.

सोशल मीडिया प्लॅटफॉम 'एक्स'वर मनसे अधिकृत या खात्यावरून पोस्ट करण्यात आली आहे. यामध्ये राज ठाकरे यांनी रेखाटलेलं एक जुनं व्यंगचित्र शेअर करण्यात आलं आहे. यासोबत "राजधानी हातातून गेली की राज्य गेलं... आज महाराष्ट्राची राजधानी मराठी माणसांना जेरीस आणून हातातून हिसकावून घेतली जात आहे पण तरीही आम्ही एकसंध मराठी समाज म्हणून लढायला तयार नाही. आम्ही जातीय विद्वेषात गुरफटलो आहोत." असे म्हटले आहे.

मुलुंडमध्ये तृप्ती देवरूखकर यांनी मुंबईत राहत असूनही इथल्या मराठी लोकांना घरं दिली जात नाहीत, त्यांना जाणूनबुजून डावललं जातं. अशा अनेक घटना रोज घडताना दिसतात असा एक व्हिडीओ शेअर करत आपली व्यथा मांडली होती. यानंतर मनसे कार्यकर्त्यांनी पुढे येत संबंधित व्यक्तीला माफी मागायला लावली होती.

यानंतर राज ठाकरे यांनी देखील मुलुंडमध्ये माझ्या महाराष्ट्र सैनिकांनी जाऊन जी समज दिली त्यांचं मनापासून अभिनंदन. तुमचं कायम लक्ष असतंच आणि मराठी माणसावर कुठेही अन्याय झालं तर त्याला महाराष्ट्र नवनिर्माण सेनाच आठवते. हे असंच सुरु राहिलं पाहिजे. अन्याय दिसेल तिथे तुमची लाथ बसलीच पाहिजे! अशा शब्दात मनसैनिकांचे कौतुक केले होते.