शिवसेना आमदार अपात्रतेचा मुद्दा पुन्हा लांबणीवर पडण्याची शक्यता वर्तवण्यात येत आहे. शिवसेनेच्या ४० आमदारांनी मुदतवाढ मागितली आहे. विधीमंडळाच्या नोटीसीला उत्तर देताना ही मुदतवाढ मागण्यात आली आहे.

विधिमंडळाकडून शिवसेनेच्या आमदारांना अपत्रतेसंबंधी नोटीस पाठवण्यात आली होती. आणखी १४ आमदारांच्या उत्तराचा आढावा घेणे बाकी असून सध्या विधीमंडळ कामकाज सुरु असल्याने या आमदारांना आता किमान दोन आठवड्यांची मुदतवाढ देण्याची शक्यता वर्तवली जात आहे.

काल विधिमंडळात बैठक झाली विधानसभा अध्यक्ष आणि सचिवांमध्ये झालेल्या या बैठकीत आमदारांच्या अपात्रतेच्या मुद्दयावर चर्चा झाली. विधानसभेचे अध्यक्ष राहुल नार्वेकर यांनी नोटीस बजावल्यानंतर शिवसेनेच्या ४० आमदारांनी त्या नोटीसीला उत्तर दिलं आहे. त्यामध्ये शिवसेनेच्या ४० आमदारांनी मुदत वाढवून मागितल्याचे समोर आलं आहे.

तर उद्धव ठाकरे गटातील १४ आमदरांच्या उत्तरांचा आढावा घेणं अद्याप बाकी आहे. दरम्यान सध्या सुरु असलेल्या पावसाळी अधिवेशनामुळे इतर कामकाज होत नसल्याने या आमदारांना मुदतवाढ मिळण्याची शक्यता आहे.