नारायणगाव - आजवर आणीबाणी विषयी ऐकली होती. पण आज केंद्र सरकारची. अघोषित आणीबाणी प्रत्यक्ष अनुभवली. अशी संतप्त प्रतिक्रिया देत आता कांदा उत्पादक व सर्वसामान्य शेतकऱ्यांचा लढा घेऊन रस्त्यावर उतरावं लागेल. असा इशारा संसदेच्या अधिवेशनादरम्यान खासदार डॉ. अमोल कोल्हे यांनी दिला.

खासदार डॉ. कोल्हे म्हणाले, अडचणी सापडलेल्या शेतकऱ्यांना दिलासा देण्यासाठी कांद्यावरील निर्यात बंदी तत्काळ उठवावी. अवकाळी पाऊस आणि दुष्काळाने ग्रासलेल्या सर्वसामान्य शेतकऱ्यांना सरसकट कर्जमाफी द्यावी, या विषयावर आज गटनेत्या खासदार सुप्रिया सुळे आणि मी अधिवेशनात चर्चेची मागणी करत होतो.

मात्र कोणतीही चर्चा न करता आम्हा दोघांचेही थेट निलंबन करण्यात आल. या निर्णयाबाबत सरकारचा तीव्र शब्दांत निषेध करताना खासदार डॉ. कोल्हे म्हणाले की, सरकारला फक्त 'मन की बात' करायची आहे, पण 'जन की बात' ऐकायची नाही हे दुर्दैव आहे.

अवकाळी पाऊसामुळे सर्वसामान्य शेतकरी आणि निर्यात बंदीमुळे कांदा उत्पादक शेतकऱ्यांवर इतकं मोठं संकट आलं असताना त्यावर कोणतीही चर्चा न करता निलंबनाची थेट कारवाई सरकारनं केली. त्यामुळे आता शेतकऱ्यांचा हा लढा घेऊन रस्त्यावर उतरावं लागेल. असा इशारा खासदार डॉ. अमोल कोल्हे यांनी दिला.