मुंबई: महाराष्ट्रात सध्या एसटी कामगारांचा संप सुरु आहे. गेल्या साधारण दीड महिन्यापासून हा संप सुरु (MSRTC Strike) असून आता तो आर या पारच्या स्थितीत असल्याचं दिसून येतंय. कामगार आपल्या मागण्यांवर पूर्णपणे ठाम असून एसटीचं राज्य सरकारमध्ये विलीनीकरण झाल्याशिवाय संप मागे घेतलाच जाणार नाही, अशी भूमिका कामगारांनी घेतलेली आहे. दुसरीकडे हा संप संपवण्यासाठी राज्याचे परिवहन मंत्री अनिल परब (Anil Parab) यांनी कामगारांना पगारवाढही करुन दिली आहे. दुसरीकडे जे कर्मचारी कामावर हजर राहणार नाहीत, त्यांच्यावर कायदेशीर कारवाईचा बडगा देखील उगारला जात आहे. (MSRTC)

एस टीचा संप कायदेशीर रित्या हाताळण्यासाठी अनिल परब पुढाकार घेत आहेत. निलंबित करण्यात आलेल्या कर्मचाऱ्यांपैकी आज ११ कर्मचाऱ्यांना बडतर्फ करण्यात आलं आहे. आज २७ कर्मचाऱ्यांना 'कारणे दाखवा नोटीस' देण्यात आली आहे. या आजच्या 27 जणांना दिलेल्या नोटीशीनंतर आतापर्यंत एकूण 257 नोटीसा देण्यात आल्या आहेत.

सध्या एकूण परिस्थितीचा आढावा घेतला तर राज्य परिवहन महामंडळातील 21873 कर्मचारी कामावर हजर आहेत. तर दुसरीकडे प्रत्यक्ष संपामध्ये 67675 कर्मचाऱ्यांनी सहभाग नोंदवला आहे. सध्या महाराष्ट्रातील 122 आगार चालू आहेत तर राज्यातील 128 आगार बंद आहेत. महामंडळाद्वारे आज सायंकाळी सहा वाजेपर्यंत 2718 फेऱ्यांद्वारे वाहतूक चालू आहे.

आज एकूण 52 कामगारांची बदली करण्यात आली असून या आकडेवारीसह आतापर्यंत एकूण 2624 कामगारांची बदली करण्यात आली आहे. आज एकूण 111 कामगार निलंबित करण्यात आले आहेत. आतापर्यंत एकूण 10481 कामगारांना निलंबित करण्यात आलं आहे. आज एकूण दोन कामगारांना सेवा समाप्तीची नोटीस पाठवण्यात आली आहे. या दोघांसह आतापर्यंत एकूण 2043 कामगारांची अशाच प्रकारे सेवा समाप्त करण्यात आली आहे.