पुणे : भाजपचे नगरसेवक पक्ष सोडून बाहेर जाण्याचा प्रयत्न करणार नाही. आमची बोट एकदम सुरक्षीत असून, इथून सुटली की सुरक्षितपणे थेट दिल्लीत थेट जाते. शिवसेना, राष्ट्रवादी आणि काँग्रेस ही बुडणारी टायटॅनिक आहे. या जहाजाला प्रत्येकजण आपापल्या बाजूने खेचत असल्याने या बुडणाऱ्या जहाजात कोणी बसणार नाही. तसेच शिवसेनेचे आता १० नगरसेवक आहेत, ते शून्य होतील, अशी टीका केंद्रीय सुक्ष्म, लघु व मध्यम उद्योग मंत्री नारायण राणे यांनी केली.

महापालिका निवडणुकीच्या पार्श्‍वभूमीवर भाजपतर्फे अटलशक्ती महासंपर्क अभियानाच्या बैठकीनंतर नारायण राणे यांनी पत्रकारांशी संवाद साधला. नारायण राणे म्हणाले, ‘‘ अटल शक्ती अभियानाच्या माध्यमातून पुणे महापालिकेत आपल्याला पुन्हा एकदा सत्ता मिळावी यादृष्टीने मार्गदर्शन करण्यात आले. सध्या ९८ नगरसेवक आहेत, यावेळी १०० पेक्षा जास्त जागा याव्यात म्हणून कार्यकर्त्यांनी लोकांना भेटून आपण सत्ताधारी म्हणून कशा पद्धतीने काम केले आहे हे सांगण्यासाठी हे अभियान आहे. देवेंद्र फडणवीस आणि चंद्रकांत पाटील यांनीही मार्गदर्शन केले.

पुणे महापालिकेत शिवसेनेचे सध्या १० नगरसेवक आहे, पण ते आता शून्य कसे होतील हेच आमचे लक्ष आहे. शिवसेनेचे नेत मनाला येईल तसे काही बोलत असतात. महापालिकेत सत्ता येणार तर किती संख्या फुगवणार?. संसदेत भाजपचे ३०३ खासदार आहे, त्यामळे शिवसेना युपीएमध्ये जाऊन काय होणार? शिवसेना ही हिंदुत्ववादी विचारसरणीची आहे. महाराष्ट्रात मुख्यमंत्री होण्यासाठी हिंदुत्वाशी गद्दारी करून सत्ता मिळवली. मग शिवसेना आता युपीएशी जवळीक साधून अजून वेगळे काय करणार आहे, अशी टीका राणे यांनी केली.

राज्याचे विधीमंडळाचे अधिवेशन कमी दिवसाचे घेता यावे यासाठी निर्बंध लादले लागते आहेत. दोन वर्ष कोरोनामुळे लोकांची आर्थिक स्थिती कमकुवत झाली असून, आत्ताच निर्बंध घालू नये.

आता मागे का फिरता

आत्ताचे मुख्यमंत्री जेव्हा सरकार नव्हते त्यावेळी सत्तेत आल्यावर तुमचा सातबारा कोरा करू, वीज फुकट देऊ, हेक्टरी ५० हजार रुपये देऊ असे सांगत होते. मग आता सत्ता असताना आश्वासनापासून मागे का फिरता?, असा प्रश्‍न राणे यांनी केला.