बंडखोर आमदारांविरोधात आता शिवसेनेतलं वातावरण चांगलंच तापलेलं दिसत आहे. अनेक ठिकाणी शिवसैनिकांनी बंडखोर आमदारांच्या पोस्टर्सला काळं फासलं आहे, तसंच अनेक ठिकाणी आमदारांच्या कार्यालयाची तोडफोडही करण्यात आली आहे. अशातच संजय राऊतांच्या एका विधानाने गोंधळ माजला आहे.संजय राऊतांच्या या विधानानंतर खासदार नवनीत राणाही संतापल्या आहेत. (Navneet Rana angry on Sanjay Raut statement)

काय आहे हे विधान?

आमच्या कुटुंबियांची जबाबदारी राज्य सरकारची आहे, अशी भूमिका एकनाथ शिंदेंनी ट्वीट करत मांडली होती. त्यानंतर संजय राऊत म्हणाले होते की, सुरक्षा महाराष्ट्रातच सोडून ढुंगणाला पाय लावून पळालेल्यांना आम्ही संरक्षण देणार नाही. आमदारांना संरक्षण असतं, त्यांच्या कुटुंबियांना नसतं. यावरुनच आता टीकेची राळ उठली आहे.

काय म्हणाल्या नवनीत राणा?

"संजय राऊतांनी विधान केलं. एकनाथ शिंदे गटात जी मूळ शिवसेना आहे, बाळासाहेबांसोबत ज्यांनी काम केलं ते एकनाथ शिंदे आणि जे खरे शिवसैनिक आहेत, ज्यांनी गेल्या अनेक वर्षांपासून हिंदूंसाठी काम केलेलं आहे, लोकांचं प्रतिनिधित्व केलं. आज ते गट उद्धव ठाकरेंपासून बाजूला गेले आणि बाळासाहेबांचे विचार पुढे नेण्यासाठी बाजूला जाऊन सांगितलं की आम्ही उद्धव ठाकरेंचे सैनिक नाही, बाळासाहेबांचे सैनिक आहोत. पण हे पाहताना सत्ता लांब जातेय म्हणून उद्धव ठाकरेंनी आत्तापर्यंत जे गुंड अडीच वर्षांपासून तयार केले आहेत, त्यांचा वापर ते आता करतायत. तीच भाषा आज संजय राऊत खासदार असताना, जबाबदार व्यक्ती असताना म्हणतायत की आमदारांना संरक्षण आहे, त्यांच्या कुटुंबियांना नाही. म्हणजे तुमच्या म्हणण्याचा अर्थ काय आहे संजय राऊतजी? की आपण त्यांच्या परिवारांना मारताय , परत नाही आला त्यांच्या परिवाराला मारण्याची सरळसरळ धमकी तुम्ही देताय"