नाशिक - नाशिक पदवीधर निवडणुकीत नवा ट्विस्ट आला आहे. शिक्षक भारती संघटनेचे आमदार कपिल पाटील यांनी अपक्ष उमेदवार सत्यजीत तांबे यांनी आपला पाठिंबा जाहीर केला आहे. त्यामुळे सत्यजीत तांबे यांची ताकद वाढली आहे. तर शुभांगी पाटील यांचा मार्ग आणखी खडतर होणार आहे. (Satyajeet Tambe news in Marathi)

सत्यजीत तांबे यांचे वडील डॉ. सुधीर तांबे आणि कपिल पाटील यांच्यात बैठक झाल्यानंतर हा पाठिंबा जाहीर करण्यात आला आहे. या पाठिंब्यानंतर डॉ. तांबे यांनी त्यांचे आभार मानले.

डॉ. तांबे म्हणाले की, मी नाशिक पदवीधरमधून तीन निवडणुका लढवल्या. पहिल्यांदा मी अपक्ष उमेदवार होतो. मला सर्व शिक्षक संघटनांनी पाठिंबा दिला. त्यामुळे शिक्षक बांधवांबाबत सदैव कृतज्ञतेची भावना आहे. शिक्षक भारतीचे अनेक पदाधिकारी कायम संपर्कात आहेत. त्याला कपिल पाटील साक्षीदार आहेत, असंही डॉ. तांबे यांनी म्हटलं.

सामान्य माणसाच्या शिक्षणाला सर्वाधिक प्राधान्य आहेत. त्यामुळे शिक्षकाला जे न्यायिक अधिकार आहे, ते मिळायलाच पाहिजे. जुनी पेन्शन योजना मिळायला हवी. इतर अनेक प्रश्न आहेत. हे महत्त्वाचे प्रश्न आहेत, असंही तांबे यांनी म्हटलं.