मुंबई: मंत्री नवाब मलिक (Nawab Malik) यांची ईडीकडून चौकशी (ED Enquiry) सुरू आहे. महाराष्ट्राच्या एका कॅबिनेट मंत्र्याला घरी येऊन घेऊन जातात हे योग्य नाही. फक्त २०२४ पर्यंत हे चालेल. २०२४ नंतर ते आहेत आणि आम्ही आहोत, असा इशारा शिवसेना नेते आणि खासदार संजय राऊत यांनी आज इशारा दिला. यावर भाजपचे प्रदेश सचिव, माजी खासदार निलेश राणे (Nilesh Rane) यांनी ट्विट करत संजय राऊत (Sanjay Raut) आणि नवाब मलिक यांच्यावर घणाघात केला आहे.

निलेश राणे भाजपवर निशाणा साधताना म्हणतात, देशद्रोह्यांशी संगनमत करून महाराष्ट्राची वाट लावणाऱ्यांना धडा शिकवायलाच हवा. मुंबईत बॉम्बस्फोट घडवणाऱ्या दाऊद इब्राहिमच्या हस्तकाकडून जमीन खरेदी करणं आणि थेट संबंध असणाऱ्या नवाब मलिक याचा कार्यक्रमच नव्हे तर पुरता बंदोबस्त व्हायला हवा असे टीकास्त्र राणेंनी सोडले.

संजय राऊत यांना टोला लागवताना राणे म्हणाले, महाविकास आघाडीच्या लोकांवर कारवाई झाली तर तपास यंत्रणेचा दुरूपयोग पण ठाकरे सरकारने संपूर्ण यंत्रणा विरोधकांना उद्ध्वस्त करण्यासाठी लावली तर ते योग्य. स्वतःवर आलं तेव्हा झोंबलं. राऊत कोणाच्या नीतिमत्ते बद्दल बोलतात? असा राणेंनी प्रश्न उपस्थित केला.

काय म्हणाले संजय राऊत

२३ हजार कोटींचा शिपयार्ड कंपनींचा घोटाळा आहे. इतके वर्ष त्याला कोण संरक्षण देत आहे. ऋषी अग्रवाल यांच्यामागे कोण उभं आहे? त्यांच्यामागे कुठल्या तपासयंत्रणा आहे आणि या सरकारमधील कोणता परिवार त्यांच्यामागे उभा आहे? हे सर्व मी सांगणार आहे. केंद्रीय तपास यंत्रणांची पोलखोल करणार आहे. त्यासाठी कितीही मोठी किंमत मोजावी लागली तरी चालेल, असं संजय राऊत म्हणाले.