जुन्या पुणे-मुंबई महामार्गावर खासगी बस दरीत कोसळून भीषण अपघात झाला आहे. या खासगी बसमध्ये 40 ते 45 प्रवासी होते. हे सगळे प्रवासी झांज वादक आणि कलाकर असल्याची माहिती आहे. या अपघातात मृत्यू झालेल्या प्रवाशांना पंतप्रधान नरेंद्र मोदी यांनी श्रद्धांजली वाहिली आहे आणि अपघातातील प्रत्येक मृताच्या नातेवाईकांना PMNRF कडून 2 लाख रुपये आणि जखमींना 50 हजारांची मदत जाहीर केली आहे.

दरम्यान पंतप्रधान नरेंद्र मोदी यांनी ट्वीट करत घटनेबद्दल शोक व्यक्त केला आहे. ट्विटमद्धे त्यांनी लिहले की, 'रायगडच्या बस अपघातात मृत्यू पावल्याची घटना दुर्दैवी आहे. ज्या लोकांनी आपले प्रियजन गमावले त्यांच्या दु:खात आम्ही सहभागी आहे. जखमी झालेले प्रवासी लवकरात लवकर बरे होतील अशी मला आशा आहे. रायगडमधील बस दुर्घटनेतील प्रत्येक मृताच्या नातेवाईकांना PMNRF कडून 2 लाख रुपये तर जखमींना 50 हजारांची मदत जाहीर करत आहे', असं ट्वीट पंतप्रधान मोदी यांनी केलं आहे.

तर राज्याचे मुख्यमंत्री एकनाथ शिंदे यांनी या घटनेबद्दल दुःख व्यक्त केलं आहे. या अपघातात मृत झालेल्यांच्या नातेवाईकांना पाच लाखांची मदत जाहीर केली आहे. तर जखमींवर शासकीय खर्चाने उपचार करण्यात येणार असल्याची माहिती मुख्यमंत्र्यांनी दिली. मुख्यमंत्री घटनास्थळी पोहचले आहेत.

जुन्या पुणे-मुंबई महामार्गावर शिंगरोबा मंदिराच्या मागे असलेल्या दरीमध्ये पहाटेच्या सुमारास खासगी बस कोसळली. या अपघातामध्ये आत्तापर्यंत 13 जणांचा दुर्दैवी मृत्यू झाला आहे. आज पहाटे 4 वाजता हा भीषण अपघात झाला. मृतांचा आकडा वाढण्याची शक्यता आहे.

ही खासगी बस पुण्यावरून मुंबईला जात होती. पहाटे 4च्या सुमारास ही बस जुन्या पुणे- मुंबई महामार्गावरील शिंगरोबा मंदिराच्या पाठीमागे येताच चालकाचा वाहनावरील ताबा सुटला. त्यामुळे खासगी बस दरीत कोसळली. ही दरी 400 ते 500 फूट खोल आहे. या बसमधून 40 ते 45 प्रवाशी प्रवास करत होते. त्यापैकी 13 जणांचा जागीच मृत्यू झाला.