नागपूर : दीक्षाभूमी परिसरात विकासकामाअंतर्गत भूमिगत वाहनतळ करताना करताना डॉ. बाबासाहेब आंबेडकर यांच्या स्मारकाला धोका होण्याच्या चिंतेने सोमवारी (ता.१) सरकार-प्रशासनासह स्मारक समितीच्या विरोधात आगडोंब उसळला. वाहनतळ परिसरात जाळपोळ केली. यामुळे आज पोलिसांनी दीक्षाभूमीच्या दिशेने येणारे सर्व मार्ग बंद केले. जणू दीक्षाभूमीला वेढा घातल्याचे चित्र होते.

दीक्षाभूमीचे प्रवेशद्वार कुलूपबंद केल्याने एकही अनुयायी दीक्षाभूमीपर्यंत पोहचू शकला नाही. जिल्हाधिकारी इटनकर यांनी मंगळवारी डॉ. आंबेडकर महाविद्यालयाला एक दिवसाची सुटी जाहीर केली होती. यामुळे आंबेडकरी समाजामध्ये असंतोष निर्माण झाला आहे. दीक्षाभूमीला सरकारने ‘अ’ दर्जाचे पयर्टन स्थळ घोषित केले. यानंतर २०० कोटी ३० लाख रुपयांच्या विकासाचा आराखडा तयार केला.

विकासाच्या पहिल्या टप्प्यात भूमिगत वाहनतळाच्या कामाला सुरुवात झाली. या वाहनतळामुळे स्मारकाला धोका निर्माण झाल्याचे संदेश सोशल मीडियावर फिरू लागले आणि आंबेडकरी अनुयायांनी क्रांतिभूमीला वाचवण्यासाठी आंदोलनाला सुरुवात केली. सुरुवातीला सामंजस्याने समितीबरोबर बैठका घेण्यात आल्या. ‘एनएमआरडी’च्या अधिकाऱ्यांनी अनुयायांशी चर्चा केली, परंतु सर्व चर्चा निष्फळ ठरल्यामुळे अनुयायांनी थेट दीक्षाभूमीवर तयार होणाऱ्या वाहनतळाची तोडफोड केली, जाळपोळ केली.

खड्डा बुजविण्याचा संकल्प

अनेक आंदोलनकर्त्यांनी काल पैसे गोळा केले. या पैशातून ‘जेसीबी’ आणून हा खड्डा बुजविण्यात येईल, असा संकल्प कार्यकर्त्यांनी केला होता. आज सकाळपासूनच अनेक अनुयायी दीक्षाभूमीच्या दिशेने निघाली होती. परंतु दीक्षाभूमीच्या सभोवतालच्या रस्त्यांवर कठडे लावल्‍याने एकाही अनुयायाला प्रवेश दिला गेला नाही.