माजी प्रशिक्षणार्थ आयएएस अधिकारी पूजा खेडकरने दिल्ली उच्च न्यायालयात केलेल्या दाव्यामुळे पुन्हा खळबळ निर्माण झाली आहे. खेडकरच्या वकिलाने आज सुरू असलेल्या सुनावणी दरम्यान न्यायालयाला सांगितले की, "यूपीएससीने माझी उमेदवारी रद्द केल्याबाबतचे कोणतेही अधिकृत पत्र मिळाले नाही. पूजाला ही सर्व माहिती प्रसार माध्यमातूनच मिळाली आहे.

युपीएससीने उमेदावारी रद्द करण्याचा निर्णय घेतल्यानंतर पूजा खेडकरने दिल्ली उच्च न्यायालयात धाव घेतली होती. दिल्ली उच्च न्यायालयाची हंगामी मुख्य न्यायाधीश मनमोह यांच्या खंडपीठासमोर बुधवारी ही सुनावणी झाली.

युपीएससीने 13 जुलै रोजी पत्रकार परिषदेच्या माध्यमातून पूजा खेडकरची उमेदावारी रद्द करण्याचा आणि तिला इथून पुढे युपीएससीच्या परीक्षेला बसू न देण्याचा निर्णय घेतला होता.

पूजा खेडकरने युपीएससीच्या परीक्षा देताना नावात बदल करणे, खोटी कागदपत्रे वापरणे आणि मर्यादेपेक्षा जास्त वेळा परीक्षा देणे यासारखे प्रकार केले होते. यामध्ये ती दोषी अढळल्यानंतर युपीएससीने कारवाई केली होती.

या प्रकरणाची सुनावणी वेळी ज्येष्ठ वकील इंदिरा जयसिंग यांनी पूजा खेडकरची बाजू मांडली. यावेळी जयसिंग यांनी प्रेस रीलिझचा संदर्भ देताना सांगितले की, “या प्रकरणातील विचित्र गोष्ट म्हणजे माझी उमेदवारी रद्द करण्याचा आदेश आजपर्यंत मला मिळालेला नाही. त्यामुळे त्यांनी प्रसार माध्यमांद्वारे दिलेला आदेश रद्द करत नवा आदेश द्यावा जेणेकरूण मला योग्य न्यायाधिकरणाकडे जाता येईल असे,” जयसिंग म्हणाल्या.

यावर युपीएससीने उच्च न्यायालयात सांगितले की, " ते पूजा खेडकरला दोन दिवसांत तिची उमेदवारी रद्द केल्याच आदेश देणार आहेत."

दरम्यान उच्च न्यायालयाने पूजा खेडकरवा उमेदवारी रद्द करण्याच्या निर्णयाला आव्हान देण्यासाठी योग्य मंचाकडे जाण्याचे स्वातंत्र्य दिले आहे.

पूजा खेडकरवरील आरोप

पूजा खेडकरवर आरोप आहे की, एक प्रशिक्षणार्थी आयएएस अधिकाऱ्याला ज्या सुविधा नसतात अशा सुविधा तिने मागितल्या होत्या.

याशिवाय वरिष्ठ अधिकाऱ्याच्या चेंबरवर कब्जा केल्याचा आणि पदाचा गैरवापर केल्याचाही आरोप आहे.

पूजा खेडकरने तिच्या वैयक्तिक ऑडी कारमध्ये लाल दिवा आणि महाराष्ट्र सरकारच असे लिहिले प्लेट लावल्याचे फोटो आणि व्हिडिओही व्हायरल झाले होते. पुढे हे प्रकरण उघडकीस आल्यानंतर युपीएससी परीक्षा देताना पूजा खेडकरने गैरप्रकार केल्याचे आरोप आहेत.