देशभरात काल गणेशोत्सवाच्या सोहळा पार पडला. घरोघरी गणरायाचे आगमन झाले. राज्यभरात गणरायाच्या आगमनाला अनेक ठिकाणी पावसाने हजेरी लावली.

बंगालच्या उपसागरामध्ये कमी दाबाचे क्षेत्र निर्माण झाले आहे. यामुळे राज्यात पावसासाठी पोषक हवामान निर्माण झालं आहे.

तर आगामी दोन दिवसांमध्ये पुण्यासह राज्यभरात जोरदार पावसाचा अंदाज हवामान विभागाने वर्तवला आहे. तर आज (बुधवारी) विदर्भात गडचिरोली, गोंदिया, चंद्रपूर जिल्ह्यात जोरदार पावसाची शक्यता आहे. कोकण परिसरात तुरळक पाऊस होईल असा अंदाज हवामान विभागाने वर्तवला आहे.

राज्यभरात आगामी तीन ते चार दिवसात राज्यात पावसाची शक्यता असल्याचा अंदाज हवामान विभागाने वर्तवला आहे. त्याचबरोबर शुक्रवारपासून राज्याच्या काही भागात पावसाचा जोर वाढण्याची शक्यता हवामान विभागाने व्यक्त केली आहे.

त्याचबरोबर उद्यापासून (२१ सप्टेंबर) पुण्यासह घाटमाथ्यावर आणि इतर काही भागांमध्ये जोरदार पाऊस होईल, असा अंदाज हवामान विभागाने वर्तवला आहे.