मुंबई : वंचित बहुजन आघाडीसोबत जागा वाटपाबाबत काँग्रेस प्रदेशाध्यक्ष नाना पटोले यांनी केलेला दावा वंचितचे संयोजक प्रकाश आंबेडकर यांनी खोडून काढला आहे. तसेच त्यांच्या विधानावरुन त्यांनी खरमरित टोलाही लगावला आहे. हा लबाडांचा पराक्रम असल्याची टिप्पणी त्यांनी केली आहे. (Prakash Ambedkar denial on Nana Patole claim that sharing seats)

प्रकाश आंबेडकर यांनी ट्विट करुन यासंदर्भातील बातम्या खोडून काढल्या आहेत. आंबेडकरांनी ट्विटमध्ये म्हटलं की, सफेद झूठ! कदाचित नाना पटोले बातम्यांमध्ये चर्चेत राहण्यासाठी हे सर्व खोटे बोलत असावेत. बरं, हे पहिल्यांदाच घडलं नाहीये तर तो लबाडांचा पराक्रम आहे.

आंबेडकर म्हणतात, जागा वाटपाबाबत पूर्णपणे काहीही सुरू केले गेलेलं नाही. INDIA Alliance किंवा MVAमध्ये वंचितला आमंत्रित करण्याबाबत काँग्रेस हायकमांडशी आमचा कोणताही संवाद झालेला नाही. तसेच, युतीचं निमंत्रण न देता जागावाटपाची कोणतीही चर्चा कशी होऊ शकते? असंही त्यांनी स्पष्टीकरण देताना म्हटलं आहे.

प्रकाश आंबेडकरांशी चर्चा सुरु झाली असून जागा वाटप अद्याप ठरलेलं नाही. मविआतील जागा वाटपाचा निर्णय दिल्लीत ठरणार आहे, अशी माहिती नाना पटोले यांनी दिली होती. त्यामुळं वंचित बहुजन आघाडीसोबतचा मविआ आणि इंडिया आघाडीचा प्रश्न सुटल्याचं बोललं जात होतं.