पुणे - उत्तरेकडून मॉन्सूनच्या परतीचा पाऊस आणि स्थानिक वातावरण यामुळे राज्यात ठिकठिकाणी पावसाने दमदार हजेरी लावली. रविवारी (ता. ८) आणि सोमवारी (ता. ९) गोव्यासह संपूर्ण राज्यात तुरळक ठिकाणी मुसळधार; तर विदर्भात तुरळक ठिकाणी मेघगर्जनेसह पाऊस पडेल, असा अंदाज भारतीय हवामानशास्त्र विभागाने वर्तविला आहे.

गेल्या दोन दिवसांपासून राज्यातील बऱ्याच ठिकाणी ढगांच्या गडगडाटासह पाऊस पडत आहे. मॉन्सूनच्या परतीचा प्रवास आठ दिवसांपूर्वी राजस्थानमधून सुरू झाला आहे. तो आता महाराष्ट्र, मध्य भारतापर्यंत पोचला आहे. त्यामुळे उत्तरेकडून येणारा परतीचा पाऊस, स्थानिक वातावरण यामुळे राज्यभरात पाऊस पडत आहे. दोन दिवसांपासून राज्यातील हवामानात बदल झाला आहे.

राज्यातील तापमान वाढले असून हवेत बाष्पदेखील आहे. त्यामुळे दुपारनंतर ढगांच्या गडगडाटासह पाऊस पडत आहे. पुण्यातही पाऊस हजेरी लावत आहे. विशेषतः उपनगरांमध्ये कात्रज, पाषाण, सिंहगड रस्ता या भागात संध्याकाळच्या सुमारास विजांच्या कडकडाटासह पाऊस पडत आहे. पुढील आठवड्यातही असाच पावसाची शक्‍यता हवामान खात्याने वर्तविली आहे.

हवामानात सोमवारपर्यंत (ता. ९) मोठे बदल घडण्याची शक्यता आहे. परिणामी, राज्यातील अनेक भागांत वीज पडण्याच्या घटनांसह वादळी वारे आणि जोरदार पावसाचा अंदाज आहे. यामुळे शेतकऱ्यांनी येत्या दोन ते तीन दिवसांत शेतीमालाची काढणी टाळावी, काढलेला शेतीमाल सुरक्षित ठिकाणी ठेवावा, जनावरांची काळजी घ्यावी आदी सूचना हवामान विभागाने दिल्या आहेत.