Rahul Kanal : वांद्रे पश्चिम मतदारसंघातील सर्व युवासेना युवक पदाधिकाऱ्यांच्या पदांना स्थगिती देण्यात आल्यानंतर राहुल कनल यांनी ठाकरे गटाच्या विरोधात पहिलं ट्विट केलं आहे. राहुल कनल यांनी ठाकरेंना जाहीरपणे जय महाराष्ट्र केला आहे. उद्या कनल शिंदे गटात प्रवेश करणार असल्याची चर्चा आहे.

युवासेना युवक पदाधिकाऱ्यांच्या पदांना स्थगिती देण्याच्या मुद्द्यावर राहुल कनल म्हणाले , जय महाराष्ट्र मी प्रमाणिक काम करणाऱ्या, दिवस-रात्र काम करणाऱ्या कार्यकर्त्यांची माफी मागतो. माझ्यामुळे तुम्हाला त्रास होत असेल. पण ही फक्त सुरूवात आहे. जी तुम्ही सुरू केली.

दुःख होतंय हे कोणी केले हे चांगले माहीत आहे. पण ज्यांनी तुमच्यासाठी काम केले आहे, अशा लोकांना न ऐकता काढून टाकणे म्हणजे अहंकार आहे. तुम्ही मला हटवू शकलात पण त्या लोकांना नाही ज्यांनी रात्रंदिवस काम केले. तरीही चलो अच्छा है सबको पता चले के अहंकार क्या होता है, असे कनल म्हणाले.

आदित्य ठाकरे यांचे अत्यंत जवळचे मानले जाणारे राहुल कनल हे उद्या १ जुलै रोजी शिवसेना शिंदे गटात प्रवेश करणार आहेत. गेल्या वर्षी राहुल कनल यांच्या घरावर सीबीआयचा छापा पडला होता. तेव्हापासून राहुल कनाल हे शिवसेनेत फारसे सक्रिय नव्हते. यामुळे ठाकरे गटाने सावध पाऊल उचलले आहे.

दरम्यान राहुल कनल यांच्या विभागातील युवासेना पदाधिकाऱ्यांच्या पदांना स्थगिती देण्यात आली आहे. वांद्रे पश्चिममधील युवासेनेच्या सर्व पदाधिकाऱ्यांच्या पदांना स्थगिती देण्यात आली आहे. शिवसेना मध्यवर्ती कार्यालयातून हे आदेश काढण्यात आले. राहुल कनाल हे उद्याच शिंदे गटात प्रवेश करणार असल्याची शक्यता आहे.