विधानसभा निवडणुकीच्या पार्श्वभूमिवर मनसे प्रमुख राज ठाकरे यांचा मराठवाडा दौरा सुरू आहे. ठाकरेंच्या या दौऱ्यादरम्यान त्यांना मराठा आंदोलकांच्या विरोधाचा सामना करावा लागला आहे. इतकेच नव्हे तर उद्धव ठाकरे यांच्या शिवसेनेच्या कार्यकर्त्यांनीही राज ठाकरे यांचा विरोध केल्याचे पाहयला मिळाले. अशात या सर्व घडामोडींवर आज संभाजीनगरमध्ये राज ठाकरे यांनी मराठा आंदोलन आणि मनोज जरांगे पाटील यांच्यावर भाष्य करत शरद पवार आणि उद्धव ठाकरे यांच्यावर हल्ला केला.

दुसरीकडे राज ठाकरे यांनी यावेळी उपमुख्यमंत्री अजित पवार यांचे कौतुक करत ते जातीच्या राजकारणा कधीच पडले नाही असे म्हटले आहे.

राज ठाकरेंनी का केलं अजित पवार यांचं कौतुक?

छत्रपती संभाजीनगरमध्ये झालेल्या राज ठाकरे यांच्या पत्रकार परिषदेत त्यांनी मराठा आंदोलकांना शरद पवार, उद्धव ठाकरे आणि काही पत्रकार करत असल्याचा आरोप केला. याचबरोबर शरद पवार जेम्स लेन प्रकरण आणि राष्ट्रवादी स्थापन केल्यापासून जातीचे राजकारण करू लागले आहे, असा आरोप केला.

दरम्यान राज यांनी यावेळी अजित पवार यांचे कौतुक करत, त्यांनी कधीच जातीचे राजकारण केले नसल्याचे म्हटले.

ठाकरे म्हणाले, "या सगळ्यामध्ये सर्वांनीच जातीचं राजकारण केले. पण मी तुम्हाला अजित पवारांबद्दल खात्रीशीरपणे सांगतो. त्यांनी कधीच जातीचे राजकारण केले नाही. त्यांचे आणि माझे मतभेद असले तरी खरं सांगतो ते कधी जाती-पातीच्या राजकारणात पडले नाहीत. एवढे निश्चित आहे. कारण त्यांचं आजपर्यंत असे कोणते वक्तव्यही ऐकले नाही आणि कधी या भानगडीतही पडले नाहीत.

मनसेची विधानसभेसाठी तयारी

गेल्या दोन विधानसभा निवडणुकांमध्ये फटका बसल्यानंतर यंदाच्या विधानसभेसाठी मनसे आणि राज ठाकरे यांनी जोरदार तयारी सुरू केली आहे. लोकसभा निवडणुकीत त्यांनी महायुतीला पाठिंबा दिला होता. त्यामुळे विधानसभा निवडणुकीत ते महायुतीसोबत लढतील अशी शक्यता होती. पण, त्यांनी यावर स्पष्टीकरण देत मनसे स्वबळावर लढणार असल्याचे सांगितले आहे. याचाच भाग म्हणून ठाकरे यांनी सोलापूरपासून मराठवाडा दौरा सुरू केला आहे. आज त्यांच्या मराठवाडा दौऱ्याचा शेवटच्या दिवस असून, काही दिवसांनी ते विदर्भ दौरा सुरू करणार आहेत.