मनसे अध्यक्ष राज ठाकरे यांनी मशिदींवरील भोंगे प्रकरणी आक्रमक भूमिका घेतल्यानंतर हा मुद्दा देशभरात गाजला, महाराष्ट्रात देखील यावरून चांगलेचे राजकीय वातावरण तापले. या दरम्यान राज ठाकरे यांनी ५ जूनला अयोध्या दौऱ्यावर जाणार असल्याची घोषणा केली. दरम्यान आता राज ठाकरे यांनी ट्विट करत पक्षाच्या सर्व पदाधिकाऱ्यांना तसेच कार्यकर्त्यांना या दौऱ्याविषयी माध्यमांशी बोलण्याबाबत काही सूचना केल्या आहेत.

राज ठाकरे यांनी त्यांच्या आयोध्या दौऱ्याबाबत पक्षातील कुणी प्रसार माध्यमांशी बोलू नये, पक्षाने प्रवक्ते नेमलेले आहेत ते याबाबत बोलतील, इतरांनी याबाबत बोलण्याचा शहाणपणा करू नये असे म्हटले आहे. इतकेच नाही तर इतर विषयांवर पदाधिकारी किंवा कोणीही जबाबदारीने बोलावे, तसेच भाषेचे भान राखावे, असे सांगण्यात आले आहे. जे लिहिलंय ते पक्षातील सर्वांनी अत्यंत गांभीर्याने घावे असा सल्ला देखील देण्यात आला आहे.

राज ठाकरे ५ जूनला अयोध्या दौऱ्यावर

राज ठाकरे यांनी ५ जून रोजी अयोध्या दौरा जाहीर केला आहे. मात्र त्याआधी उत्तर प्रदेश व बिहारच्या लोकांवर मनसेच्या लोकांनी केलेल्या हल्ल्यांबद्दल आणि त्यांच्या अपमानाबाबत राज ठाकरे यांनी हात जोडून या राज्यांसह संपूर्ण उत्तर भारताच्या जनतेची जाहीर माफी मागावी असे विधान भाजप खासदार बृजभूषण सिंह (Brujbhushan Singh) यांनी केले होते. तसेच माफी मागितल्याशिवाय त्यांना अयोध्येत घुसू देणार नाही, असा इशारा भाजप (BJP) खासदार ब्रिजभूषण शरण सिंह यांनी दिला होता. त्यानंतर या इशाऱ्याला मनसेकडून प्रत्युत्तर देखील देण्यात आले होते.