राज्यातील दोन शहरे औरंगाबाद आणि उस्मानाबाद यांच्या नामांतराचा मुद्दा बऱ्याच दिवसांपासून चर्चेत आहे. राज्य सरकारने या दोन शहरांची नावे छत्रपची संभाजीनगर आणि धारशिव करण्याचा निर्णय घेतला आणि या निर्णयाला विरोध देखील झाला. दरम्यान औरंगाबाद आणि उस्मानाबाद नामांतर प्रकरणात आता मोठी अपडेट समोर आली आहे. या दोन्ही जिल्ह्यांची नावे महसूल क्षेत्र (जिल्हा आणि तालुका पातळीवर) औरंगाबाद आणी उस्मानाबाद हीच नावे राहणार आहेत. मुंबई हायकोर्टाने याबद्दलचा निर्णय जाहीर केला आहे.

न्यायालयात औरंगाबाद आणि उस्मानाबाद नामांतर फक्त शहरापुरतं झालं होतं. जिल्हा आणि तालुका पातळीवर कोणताही बदल झाला नाही अशी भूमिका राज्य सरकारने घेतली होती. सरकारने अद्याप अंतिम निर्णय घेतला नसल्यामुळे आव्हान देणाऱ्या याचिका निकाली काढण्यात आल्या आहेत. याचिकांच्या वैधतेवर सरकारने जोरदार आक्षेप नोंदवला होता. यानंतर महसूल आणि जिल्हा पातळीवरच्या नामांतराला आव्हान देणार्‍या याचिका उच्च न्यायालयाने निकाली काढल्या.

जेव्हा शासन आदेश निघेल त्यावेळी याचिकाकर्त्यांना नव्याने याचिका दाखल करण्यास न्यायालयाने मुभा दिली आहे. तसेच तूर्तास तालुका आणि जिल्हा पातळीवर नवीन नावे वापरणार नाही अशी राज्य सरकारने उच्च न्यायालयात हमी दिली आहे. आता औरंगाबाद शहर आणि उस्मानाबाद शहराच्या नामांतराला आव्हान देणार्‍या याचिकांवर ४ ऑक्टोबरला अंतिम सुनावणी होणार आहे.