मुंबईः शरद पवारांना सैतान असं म्हटल्यानंतर राज्यभरात सदाभाऊ खोतांविरोधात कार्यकर्ते आक्रमक झालेले बघायला मिळाले. त्यावर सदाभाऊ आक्रमक झाले असून तुम्हांला काय करायचं ते करा, अशी भूमिका त्यांनी घेतली आहे.

रयत क्रांती सेनेचे प्रमुख सदाभाऊ खोत हे शरद पवार यांच्याविषयी बोलताना त्यांची जीभ घसरली होती. शरद पवारांवर त्यांनी जहरी टीका करत त्यांचा उल्लेख काल 'सैतान' असा केला होता. माध्यमांशी बोलताना सदाभाऊ खोत म्हणाले की, "महाराष्ट्रातील राजकारण प्रस्थापितांकडून विस्थापितांकडे चालल्याचं बघायला मिळतयं. महाराष्ट्राच्या जडणघडणीमध्ये यशवंतराव चव्हाण, सुधाकरराव नाईक, वसंतदादा पाटील या माणसांच मोठं योगदान आहे."

८०च्या दशकामध्ये महाराष्ट्राच्या राजकारणात शरद पवार साहेबांचा उदय झाला आणि तिथून पुढे राजकारणाचा ऱ्हास व्हायला सुरुवात झाली आणि इतका ऱ्हास झाला की वाडे विरुद्ध गावगाडे आणि प्रस्थापित विरुद्ध विस्थापित असा नवा संघर्ष उभा राहिला. सरंजामशाहीचा कालखंड पवारांमुळे उभा राहिलेला संपूर्ण महाराष्ट्राने पाहिला आणि हा अंमल जवळजवळ ५० वर्ष या राज्यामध्ये राहिला." हे सांगतांनात त्यांनी शरद पवारांंचा उल्लेख सैतान असा केला.

खोतांच्या या विधानानंतर राज्यभरात आरोप-प्रत्यारोपांच्या फैरी झडू लागल्या होत्या. त्यानंतर त्यांनी अनावधानाने बोलून गेलो, अशी सारवासारव केली होती. मात्र तरीही वादंग पेटलेलंच होते. त्यामुळे शेवटी सदाभाऊ आक्रमक झाले.

खोत म्हणाले की, तुम्हांला काय करायचं ते करा. आमचं काय वाईट करणार तुम्ही? राजकारणातून उठवणार का? नंगे को खुदा भी डरता है.. हम भी नंगे हैं.. और तुम कितने नंगे हो हम भी दिखा देंगे. आमच्याकडेही मोठ्या पोथ्या आहेत.. असं म्हणून एक प्रकारे त्यांनी इशाराच दिला आहे.