मुंबईः शिवप्रतिष्ठान हिंदुस्थानचे संस्थापक संभाजी भिडे यांनी काल महात्मा गांधींबद्दल आक्षेपार्ह विधान केलं होतं. त्यांच्या विधानानंतर राज्यभरातून त्यांच्यावर टीका झाली. काही ठिकाणी आंदोलनंही झाली.

आज पुन्हा संभाजी भिडे यांनी पंडित जवाहरलाल नेहरु यांच्याबद्दल वादग्रस्त विधान केलं आहे. पंडित नेहरु यांचं अखंड हिंदुस्थानसाठी नखाएवढंही योगदान नाही, असं म्हणून त्यांनी पुन्हा स्वतःकडे वाद ओढवून घेतला आहे.

यवतमाळ येथे शिवप्रतिष्ठानच्या वतीने संभाजी भिंडेंच्या व्याख्यानाचं आयोजन करण्यात आलेलं होतं. मात्र आज त्यांनी महात्मा गांधी यांच्याबद्दल भाष्य करणं टाळलं. मात्र त्यांनी पुन्हा एकदा पंडित जवाहरलाल नेहरु यांना लक्ष्य केलं.

''नेहरुंना हिंदुस्थानबद्दल प्रेम नव्हतं. देशासाठी नेहरुंचं नखभरही योगदान नाही. तरीही ते पंतप्रधान झाले. चीनबरोबर नेहरुंनी केलेला पंचशील करार हिंदुस्थानला मारक ठरला, त्या करारामुळे भारताचा पराभव झाला. देशाचा ईशान्यकडील भाग चीनला त्यामुळेच गिळंकृत करता आला'' असं भिडेंनी व्याख्यानावेळी बोलतांना म्हटलं.

संभाजी भिडेंनी काल काय म्हटलं होतं?

अमरावतीच्या बडनेर इथं झालेल्या कार्यक्रमात बोलताना संभाजी भिडेंनी महात्मा गांधींचे वडील करमचंद गांधी यांच्याबाबत वादग्रस्त विधान केलं आहे. करमचंद गांधी हे मोहनदास अर्थात गांधीजींचे खरे वडील नसून ते एका मुस्लीम जमीनदाराचे पुत्र होते, असं वक्तव्य संभाजी भिडेंनी केलं होतं.

इतकेच नाही तर मोहनदास यांचा सांभाळ व शिक्षणही त्याच मुस्लीम पालकानं केल्याचा दावा देखील भिडेंनी केला होता. दरम्यान, या विधानामुळं मोठं वादंग निर्माण झालं असून काँग्रेस नेते आक्रमक झाले असून त्यांच्या अटकेची मागणी केली आहे. भिडेंविरोधात अमरावतीमध्ये गुन्हा देखील दाखल झाला आहे.