पुणेः दौंडमध्ये विद्या प्रतिष्ठानच्या अनंतराव पवार इंग्लिश मीडियम स्कूलच्या इमारतीचा उद्घटन सोहळा संपन्न झाला. या कार्यक्रमाला शरद पवार, अजित पवार आणि सुप्रिया सुळे यांची उपस्थिती होती. काका-पुतणे जाहीर व्यासपीठावर उपस्थित राहिल्याने सर्वांच्याच भूवया उंचावल्या.

या कार्यक्रमामध्ये अजित पवारांनी कुठलंही राजकीय भाष्य केलं नाही. परंतु शरद पवारांच्या कार्याचा उल्लेख करीत त्यांनी संस्थेची प्रगती विषद केली. महत्त्वाचं म्हणजे शरद पवारांच्या समोरच त्यांनी कर्मचाऱ्यांना दम देऊन चांगलं काम करण्याच्या सूचना केल्या.

अजित पवार बोलताना म्हणाले की, पवार साहेबांनी शेती क्षेत्रासाठी कृषी विकास प्रतिष्ठान स्थापन केलं आणि शिक्षणाकरिता विद्या प्रतिष्ठानची स्थापना केली. पुणे आणि पुणे जिल्ह्यामध्ये या संस्थेचं मोठं जाळं आहे. इंदापूरमध्येही शाळेची शाखा सुरु झाल्याने इंग्रजी माध्यमाची शाळा आम्ही पवार साहेबांच्या माध्यमातून सुरु केली.

''विद्या प्रतिष्ठान हे एक शैक्षणिक क्षेत्रातलं मोठं नाव आहे. गुणवत्ता जोपासण्यासाठी आणि गरीबांच्या मुलांना शिक्षण देण्यासाठी आम्ही सगळेजण प्रयत्न करत असतो. आज अनंतराव पवार इंग्रजी माध्यम शाळेच्या इमारतीचं १ लाख स्क्वेअर फुटाचं बांधकाम झालेलं आहे. स्वामी चिंचोली इथं शिक्षणासाठी मोठं संकूल उभारलं गेलं आहे. त्यामुळे शिक्षणाचा दर्जा आणखी वाढण्यास मदत होईल.''

अजित पवार पुढे म्हणाले की, शिका, नेतृत्व करा आणि बदल घडवा.. हे या संस्थेचं ब्रीदवाक्य आहे. त्यादृष्टीने आम्ही काम करत आहोत. दौंडमध्येही विद्या प्रतिष्ठानची शाळा व्हावी, ही साहेबांची इच्छा आहे. परंतु जागा मिळत नसून लवकरच त्यावर तोडगा काढला जाणार आहे.

पवार पुढे बोलले, अनंतराव पवार यांच्या नावाने ही शाळा आहे. त्यांच्या नावाला साजेसं शिक्षण इथं दिलं गेलं पाहिजे.. जर कुणी कमी पडलं तर माझ्याशी गाठ आहे. इथं शिक्षण घेणारा विद्यार्थी लाथ मारीन तिथे पाणी काढेल, असा घडला पाहिजे, असा दम अजित पवारांनी संस्थेच्या कर्मचाऱ्यांना भरला.