जळगावः राष्ट्रवादी काँग्रेसचे अध्यक्ष शरद पवार आणि मंत्री गुलाबराव पाटील यांनी आज एकत्र प्रवास केला आहे. उभय नेत्यांमध्ये अनेक महत्त्वाच्या विषयांवर चर्चा झाल्याची माहिती आहे.

राज्याच्या राजकारणात सध्या सगळा अवमेळ सुरु असल्याचं पहायला मिळत आहे. विरोधी पक्ष एकमेकांवर टीका करतच आहेत. परंतु सत्तेतील पक्षांमध्येही बेबनाव झाल्याचं दिसून येतंय. शिवाय मंत्रिमंडळ विस्तारामुळे संभाव्य नाराज्या लपून राहिलेल्या नाहीत.

त्यातच आज राष्ट्रवादी काँग्रेसचे अध्यक्ष शरद पवार आणि मंत्री गुलाबराव पाटील यांनी सोबत प्रवास केल्याचं चित्र महाराष्ट्राने पाहिलं. दोन्ही नेते जळगावच्या दौऱ्यावर असल्याची माहिती आहे. दोघांनी एकत्र रेल्वे प्रवास केल्याचे फोटो सोशल मीडियात व्हायरल झालेले आहेत.

उद्या शरद पवार हे जळगावच्या दौऱ्यावर आहेत. अंमळनेर येथे राष्ट्रवादी काँग्रेसच्या ग्रंथालय विभागाचे एकदिवसीय शिबीर होत आहे. या शिबिराला शरद पवार हे मार्गदर्शन करणार आहेत. तर गुलाबराव पाटील हेही जिल्ह्याच्या दौऱ्यावर गेले आहेत.

सध्याच्या राजकीय परिस्थितीवर दोन्ही नेत्यांनी चर्चा केल्याची माहिती मिळत आहे. विशेष म्हणजे भाजप काही मंत्र्यांना डच्चू देणार आहे. त्यामध्ये गुलाबराव पाटील यांचं नाव घेतलं जात आहे. तसं झालं तर गुलाबराव पाटलांची पुढची दिशा काय असेल? यासंबंधी तर्क लढवले जात आहेत.

दरम्यान, विधानसभेचे विरोधी पक्षेनेते अजित पवार आज धुळे जिल्ह्याच्या दौऱ्यावर होते तेथे आयोजित कार्यकर्ता मेळाव्यात त्यांनी फोडाफोडी करणाऱ्या कार्यकर्त्यांना चांगलाच दम भरला. फोडाफोडी आणि जिरवाजिरवी कराल तर माझ्याशी गाठ आहे, असा इशाराच अजित पवारांनी यावेळी दिला.