राष्ट्रवादी पक्ष कोणाचा यावरून शरद पवार आणि अजित पवार गट याच्यात केंद्रीय निवडणूक आयोगासमोर संघर्ष सुरु आहे. यादरम्यान दोन्ही गटांमधील नेत्यांकडून आगामी निवडणूकांच्या पार्श्वभूमीवर राज्यभर दौरे केले जात आहेत. यादरम्यान दिवाळीच्या दुसऱ्याच दिवशी शरद पवार हे थेट शेतकऱ्यांच्या बांधावर पोहचणार आहेत. पवार हे 16 नोव्हेंबर रोजी माढा लोकसभा मतदारसंघातील कापसेवाडीत शेतकरी मेळाव्याला उपस्थित राहणार आहेत.

सोलापूर, उस्मानाबाद आणि सांगली जिल्ह्यातील शेतकरी मेळाव्याला शरद पवार उपस्थित राहणार आहेत. सध्या या तिन्ही जिल्ह्यात बेदाणा, दूध आणि टॉमॅटोचा प्रश्न ऐरणीवर आहेत. या पार्श्वभूमिवर शरद पवारांचा हा दौरा महत्वाचा ठरणार आहे.

राज्यात 2 लाख 57 हजार टन बेदाण्याचे उत्पादन घेतले जाते यातील तब्बल 94 हजार टन बेदाणा योग्य दर मिळत नसल्याने अजुनही कोल्ड स्टोरेज मध्ये पडून आहे. तसेच शेतकऱ्यांची बेदाण्यावरील निर्यात शुल्क कमी करुन आयात शुल्क वाढवण्याची मागणी उत्पादकांकडून केली जात आहे.

शेतकऱ्यांनी वाय बी चव्हाण सेंटर येथे भेटुन शरद पवारांसमोर याबद्दलची व्यथा व्यक्त केली, यानंतर शरद पवार यांनी तातडीने कापसे वाडी येथील मेळाव्याला येण्याचं मान्य केलं आहे.