मुंबईः २ मे रोजी राष्ट्रवादी काँग्रेसचे राष्ट्रीय अध्यक्ष शरद पवार यांनी निवृत्तीची घोषणा केली होती. मात्र राष्ट्रवादीच्या कार्यकर्त्यांनी त्यांच्या या घोषणेला कडाडून विरोध केला.

त्यानंतर शरद पवार यांनी दोन ते तीन दिवसांचा वेळ मागितला होता. मगच आपण आपली भूमिका जाहीर करु, असं ते म्हणाले. आज पुन्हा शरद पवार यांनी दोन दिवसांची वेळ घेतली.

उद्या राष्ट्रवादी काँग्रेसची महत्त्वाची बैठक पार पडणार आहे. या बैठकीमध्ये शरद पवार हेच राष्ट्रीय अध्यक्ष राहावेत, असा प्रस्ताव ठेवण्यात येणार असल्याची सूत्रांची माहिती आहे.

मीडिया रिपोर्टनुसार २०२४ पर्यंत शरद पवार यांनी राष्ट्रीय अध्यक्षपदाची जाबाबदारी सांभाळावी आणि एक कार्याध्यक्ष नेमावा असा प्रस्ताव ठेवण्यात येणार आहे. दरम्यानच्या काळात कार्याध्यक्षलाही तयारी करायला वेळ मिळेल.

हा प्रस्ताव ठेवण्यात येणार असल्याची सूत्रांची माहिती असून शरद पवार हा प्रस्ताव स्वीकारतील, असंही बोललं जात आहे. त्यामुळे २ मे रोजी शरद पवारांनी घेतलेला निर्णय ते उद्या मागे घेणार का, हे स्पष्ट होईल.

शरद पवार यांच्यावर कार्यकर्त्यांचा दबाव वाढत आहे. पवारांनी पदावरुन बाजूला जावू नये, सध्या राज्यात आणि देशात वेगळी परिस्थिती आहे, विरोधकांना एकजुटीने लढावे लागेल, अशा भावना व्यक्त होत आहेत. त्यामुळे पवार माघार घेतील, असं राजकीय जाणकार सांगत आहेत.