मुंबईः डीपफेक प्रकरणावरुन सध्या वातावरण तापलेलं आहे. महिला-मुलींना भविष्यात भीषण संकटांना सामोरं जावं लागणार असल्याचं दिसून येतंय. खुद्द पंतप्रधान नरेंद्र मोदी यांनीही डीपफेकचं संकट बोलून दाखवलं होतं. त्यातच आता राज ठाकरे यांच्या पत्नी शर्मिला ठाकरे यांनी त्यांच्या मुलीला होणाऱ्या त्रासाबद्दल भाष्य केलं आहे.

शर्मिला ठाकरे म्हणाल्या की, आम्हीही यातून जातोय. माझ्या मुलीला 'यु ट्यूब'वर काही लोक वाट्टेल तसे मेसेज करत असतात. याबाबत मी नेहमी पोलिस आयुक्तांकडे तक्रार करते. तेही फारकाही करु शकत नाहीत. अटक करतात परंतु त्या मुलांना कायद्याप्रमाणे सोडून द्यावं लागतं.

ठाकरे पुढे म्हणाल्या, आपल्याकडे ब्रिटिशकालीन कायदे आहेत, त्यामुळे आरोपींना सोडून द्यावं लागतं. त्यामुळे कायदे बदलले पाहिजेत. विधानसभेत कायद्यात बदल करणं अपेक्षित असल्याचं ठाकरेंनी स्पष केलं. ऑनलाईनचं हे संकट भविष्यात उग्र रुप धारण करण्याचा धोका यातून दिसून येत आहे.

मागील काही दिवसांपासून आलिया भट्ट, कतरिना कैफ, रश्मिका मंदाना या अभिनेत्री डीपफेकच्या शिकार झालेल्या आहेत. अनेकांकडून अशा व्हिडीओ बनवणाऱ्यांवर कायदेशीर कारावई करण्याची मागणी होत आहे. एआय तंत्रज्ञान वापरुन असे व्हिडीओ बनवले जातात आणि व्हायरल केले जातात. त्यामुळे या संकटाला सरकारं कशी तोंड देणार, याकडे सर्वांचं लक्ष लागून राहिलं आहे.