पुणेः राज्याच्या राजकारणामध्ये भूकंप या शब्दाला आता फारसा अर्थ उरलेला नाही. कारण २०१९पासून महाराष्ट्राने जे काही धक्के पचवले आहेत, त्याला तोड नाहीत. त्यातच आज ठाकरे गटाच्या खासदाराने एक विधान केल्याने आश्चर्य व्यक्त होतय.

ठाकरे गटाचे ज्येष्ठ नेते तथा खासदार विनायक राऊत हे आज पुण्याच्या दौऱ्यावर होते. माध्यमांशी बोलतांना राऊत म्हणाले की, कितीही फोडाफोडी झाली आणि कुणीही एकत्र आलं तरी महाविकास आघाडीला निवडणुकांमध्ये मोठं यश मिळणार आहे. उद्धव ठाकरे आणि शरद पवार हे महाविकास आघाडीत आहेत, त्यामुळे काहीही चिंता नाही.

विनायक राऊत पुढे म्हणाले की, शिंदे गटाची कितीही पोपटपंची सुरु असली तरी मंत्रिमंडळ विस्तार होणार नाही. उलट भाजपकडून शिंदे गटाच्या विसर्जनाची तयारी सुरु झाली आहे. असं म्हणून राऊतांनी राजकीय वर्तुळाच चर्चा घडवून आणली.

''शिंदे गटातील आमदार आमच्याशी संपर्कात आहेत. परंतु ते गद्दारी करुन तिकडे गेल्यामुळे त्यांच्याबबात अजून निर्णय घेतलेला नाही. शिवसेना निष्ठावंतांना पुढे घेऊन जाणार असल्याचं राऊतांनी स्पष्ट केलं.

राज्यात कधी काय घडेल याचा नेम नाही. काल मुख्यमंत्री एकनाथ शिंदेंनी कुटुंबासह दिल्लीवारी केल्यामुळे त्यांचं मुख्यमंत्रीपद धोक्यात आलंय का? अशा चर्चा रंगल्या होत्या. परंतु नंतर रावसाहेब दानवे यांनी निवडणुकीपर्यंत एकनाथ शिंदे हेच मुख्यमंत्री राहतील, असं स्पष्ट केलं.