छत्रपती शिवाजी महाराज चौकात, एसटी स्टॅण्डसमोर, नवीवेस पोलिस चौकीसमोरील चौक, याठिकाणी नेहमीच वाहनांची मोठी वर्दळ असते. आता सणासुदीत ग्रामीण भागातूनही अनेकजण वस्तू, साहित्य खरेदीसाठी सोलापूर शहरात येतात. उत्सव काळात एसटी गाड्यांच्या फेऱ्याही वाढलेल्या असतात. या पार्श्वभूमीवर त्या चौकांमध्ये वाहतूक पोलिस अंमलदार नेमले जाणार आहेत. याशिवाय सकाळी आठ ते रात्री १० या वेळेत वाहतूक पोलिसांची शहरभर गस्त राहणार आहे.

शहरात सध्या १५ सिग्नल सुरु असून त्याठिकाणी फिक्स पॉइंट असणार आहेत. पोलिस आयुक्त एम. राज कुमार, पोलिस उपायुक्त अजित बोऱ्हाडे, सहायक पोलिस आयुक्त सुधीर खिराडकर यांच्या मार्गदर्शनाखाली दोन्ही विभागाचे वाहतूक शाखेचे वरिष्ठ पोलिस निरीक्षक तानाजी दराडे, सूरज मुलाणी यांच्या नियोजनातून शहरात वाहतूक कोंडी होणार नाही, असे नियोजन करण्यात आले आहे.

दोन चौकात आता नव्याने सिग्नल

लोकशाहीर अण्णा भाऊ साठे चौकात सिग्नल आहे, पण देगाव रोडवरून जड वाहतूक बंद करण्यात आल्याने तो सिग्नल तूर्तास सुरू केला जाणार नाही. पण, आगामी काही दिवसांत होटगी रोडवरील महिला हॉस्पिटल व विको प्रोसेस येथील सिग्नल नव्याने सुरू करण्यात येणार आहेत. त्याची कार्यवाही सध्या सुरु असल्याची माहिती शहर वाहतूक शाखेच्या अधिकाऱ्यांनी दिली.

गर्दीच्या ठिकाणी वाहतूक अंमलदार

शहरात ज्या परिसरात गणेशमूर्ती, साहित्य विक्री मोठ्या प्रमाणावर होते आणि तेथे ग्राहकांची मोठी गर्दी असते, ते मार्ग सध्या वाहतुकीसाठी बंद करण्यात आले आहेत. तेथे वाहतूक अंमलदारांची नेमणूक करण्यात आली आहे. दुसरीकडे सिग्नलच्या वेळेत सर्वच सिग्नल सुरु राहतील. याशिवाय ज्या रस्त्यावर वाहनांची गर्दी होऊन वाहतूक कोंडी निर्माण होवू शकते, अशा ठिकाणीही अतिरिक्त अंमलदार असतील.

- अजित बोऱ्हाडे, पोलिस उपायुक्त, सोलापूर शहर