सातारा सत्र न्यायालयानं अॅड. गुणरत्न सदावर्ते यांना जामीन मंजूर केला आहे, यामुळं सदावर्ते यांना काहीसा दिलासा मिळाला आहे. छत्रपती घराण्याबद्दल आक्षेपार्ह विधान केल्याप्रकरणी सातारा पोलिसांमध्ये त्यांच्याविरोधात गुन्हा दाखल झाला होता त्यामुळं पोलिसांनी त्यांना अटक केली होती. (Some relief to advt Gunaratn Sadavarte Satara court grants bail)

साताऱ्यात दाखल करण्यात आलेल्या गुन्ह्यात अॅड. सदावर्ते यांना जमीन मंजूर झाला असून ४ दिवसांच्या पोलीस कोठडीनंतर दोन दिवसांपूर्वी त्यांना १४ दिवसांची न्यायालयीन कोठडी मिळाली होती. छत्रपती घराण्याबद्दल आक्षपार्ह विधान केल्यामुळे सदावर्ते यांच्यावर गुन्हा दाखल झाला होता.

दरम्यान, शरद पवार यांच्या मुंबईतील निवासस्थानी हल्ला झाल्यानंतर गुणरत्न सदावर्ते आणि अन्य ११४ कर्मचाऱ्यांवर कारवाईचा बडगा उचलण्यात आला. नुकतीच मुंबई सत्र न्यायालयानं सदावर्तेंना १४ दिवसांची न्यायालयीन कोठडी सुनावली. पण त्यांच्यामागे चौकश्यांचा ससेमिरा कायम आहे.

कोल्हापूर, सातारा, अकोला अशा वेगवेगळ्या ठिकाणी त्यांच्यावर गुन्हे दाखल झाल्याने विविध प्रकरणांमध्ये चौकशीसाठी त्यांची पोलीस कस्टडी मागण्यात येत आहे. त्यांच्या पत्नीवरही गुन्हा दाखल झाल्याने त्या देखील अडचणीत आल्या आहेत.