मुंबई : मध्य प्रदेशातील ओबीसी आरक्षण सर्वोच्च न्यायालयाने दिलासा दिला आहे. त्यानंतर आता राज्य ओबीसी आयोग कामाला लागला असून, उद्यापासून आठ दिवस राज्यातील विविध विभागात दौऱ्याचे आयोजन करण्यात आले आहे. या दौऱ्याची सुरुवात पुण्यापासून केली जाणार आहे. (OBC Reservation News)

दौऱ्याच्या सुरुवातीला ओबीसी आयोगातील कर्मचारी पुणे येथील विभागीय आयुक्त कार्यालयात नागरिकांना भेटणार आहेत. त्याशिवाय या आठ दिवसीय दौऱ्यामध्ये महाराष्ट्रातील ओबीसी आरक्षणाबाबत आवश्यक माहिती गोळा केली जाणार आहे.

असा असणार दौरा

ओबीसी आयोगाचा राज्य दौरा 21 मे रोजी पुण्यापासून सुरु होईल, 22 मे औरंगाबाद, 25 मे नाशिक, 28 मे कोकण विभाग या दौऱ्यामध्ये विदर्भाबाबत अद्याप कोणतीही घोषणा करण्यात आलेली नाही.

महाराष्ट्रालाही न्याय मिळेल : छगन भुजबळ

महाराष्ट्रातील ओबीसींचा प्रश्‍न सुटण्याचा मार्ग मोकळा झाला आहे. मध्य प्रदेशाप्रमाणे महाराष्ट्राला न्याय मिळेल, असे अन्न, नागरी पुरवठा व ग्राहक संरक्षण मंत्री छगन भुजबळ यांनी म्हटले आहे. राज्य सरकारने माजी मुख्य सचिव जयंतकुमार बांठिया यांच्या अध्यक्षतेखाली समर्पित ओबीसी आयोगाची स्थापना करून ओबीसींचा ‘इम्पिरिकल डेटा जमा करण्याचे काम चालू केले आहे. काही दिवसांपूर्वी आम्ही त्यांची भेट घेऊन लवकर डेटा देण्याची मागणी केली. सप्टेंबर- ऑक्टोबरपर्यंत निवडणुका होऊ शकत नाही. हा डेटा जमा करून महाराष्ट्रात ओबीसी आरक्षण पूर्ववत होईल, असा विश्वास भुजबळ यांनी व्यक्त केला.