मुंबई- ठाकरे गटाचे नेते सुधाकर बडगुजर यांच्या अडचणी वाढताना दिसत आहेत. कारण, त्यांच्याविरोधात गुन्हा दाखल करण्यात आला आहे. पदाचा गैरवापर करुन कंपनीला कंत्राट दिल्याप्रकरणी त्यांच्यावर हा गुन्हा दाखल करण्यात आला आहे. एसीबीने याप्रकरणी तक्रार दिली होती. (sudhakar Badgujar of the Thackeray group A case has been registered acb salim kutta)

सलिम कुत्ता प्रकरणात बडगुजर यांची चौकशी सुरु आहे. नागपूरच्या हिवाळी अधिवेशनात हा मुद्दा गाजला होता. भाजप नेते नितेश राणे यांनी बडगुजर यांचा बॉम्ब स्फोटातील आरोपी सलिम कुत्ता याच्याशी संबंध असल्याचा आरोप केला होता. यावेळी त्यांनी एक फोटो आणि एक व्हिडिओ समोर आणला होता. त्यामुळे बडगुजर अडचणीत आले होते.

आता अँटी करप्शन ब्युरोच्या कचाट्यात बडगुजर सापडले आहेत. एसीबीने सरकारवाडा पोलीस स्टेशनमध्ये तक्रार दाखल केली होती. त्यानंतर त्यांच्यावर गुन्हा दाखल करण्यात आला आहे. माहितीनुसार, २०१६ मध्ये बडगुजर महापालिकेमध्ये असताना त्यांच्याकडून काही कंत्राट त्यांच्या जवळच्या कंपनीला देण्यात आले होते. याप्रकरणी तपास सुरु होता. त्यानंतर आता गुन्हा दाखल करण्यात आल्याची माहिती आहे.

बडगुजर यांनी भाजपने केलेले आरोप फेटाळून लावले होते. माझा आणि सलिम कुत्ता याचा काहीही संबंध नसल्याचं ते म्हणाले होते. याप्रकरणी त्यांनी पत्रकार परिषद घेऊन आरोपांना उत्तर दिले होते. मात्र, नव्या प्रकरणामुळे त्यांच्या पाय आणखी खोलात गेला आहे. दरम्यान, ठाकरे गटाच्या नेत्यांवरील आरोपांमध्ये वाढ होताना दिसत आहेत. त्यामुळे सरकारकडून ठाकरे गटाला अडचणीत आणण्याचा प्रयत्न सुरु असल्याची चर्चा सुरु झाली आहे. (Latest Marathi News)